សមាជិកសភាតៃវ៉ាន់ វាយគ្នាដូចរឿងកុន

ព័ត៌មានអន្តរជាតិថ្ងៃអាទិត្យ ទី19 ខែឩសភា ឆ្នាំ2024 ម៉ោង 4:12 នាទី ល្ងាច

ដោយ សូរ្យសែង៖

សមាជិកសភាតៃវ៉ាន់បានវាយប្រទាញប្រទង់គ្នា នៅក្នុងសភាកាលពីថ្ងៃសុក្រ ទី១៧ ខែឧសភា ចំពេលមានជម្លោះអំពីកំណែទម្រង់រដ្ឋសភា មុនពេលប្រធានាធិបតី ឡៃ ឈិងទើ ចូលកាន់តំណែង ដោយគ្មានសំឡេងភាគច្រើននៅក្នុងសភា ។

មុនការបោះឆ្នោត សមាជិកសភាមួយចំនួនបានស្រែកដាក់គ្នា ហើយរុញគ្នាចេញពីបន្ទប់ប្រជុំ មុននឹងឈានទៅរកភាពចលាចលនៅលើកម្រាលឥដ្ឋ ដែលមានសមាជិកសភាមកចោមរោមមើល ។

លោក ឡៃ ឈិងទើ នឹងស្បថចូលកាន់តំណែងនៅថ្ងៃចន្ទ ទី ២០ ឧសភា បន្ទាប់ពីឈ្នះការបោះឆ្នោតកាលពីខែមករា ២០២៤ ប៉ុន្តែគណបក្សប្រជាធិបតេយ្យជឿនលឿន (DPP) របស់លោកមានអាសនៈតែ ៥១ ក្នុងសភាប៉ុណ្ណោះ ។ ចំណែកគណបក្ស កុកមីងតាំង Kuomintang (KMT) ដែលមានសំឡេងច្រើនជាងមាន ៥២ អាសនៈ មិនអាចបង្កើតរដ្ឋាភិបាលបាន។ ដូច្នេះហើយត្រូវរួមដៃគ្នាបង្កើតបក្សប្រឆាំងជាមួយបក្សតូចៗ។ គណបក្សប្រឆាំងប្រជាជនតៃវ៉ាន់ (TPP) ចង់ឱ្យសភាមានអំណាចត្រួតពិនិត្យបន្ថែមទៀតលើរដ្ឋាភិបាល រួមបញ្ចូលទាំងសំណើដ៏ចម្រូងចម្រាសដើម្បីដាក់ទោសមន្ត្រី ដែលត្រូវបានចាត់ទុកថាជាសេចក្តីថ្លែងការណ៍មិនពិតទៅកាន់សភា ។

ប៉ុន្តែសមាជិកសភា DPP បានបដិសេធ ហើយអះអាងថា KMT និង TPP កំពុងព្យាយាមមិនត្រឹមត្រូវ ដើម្បីបង្ខំឱ្យសំណើនេះ អនុម័ត។ បើគ្មានដំណើរការពិគ្រោះយោបល់តាមទម្លាប់ វាត្រូវបានចាត់ទុកថាជា «ការបំពានអំណាចរដ្ឋធម្មនុញ្ញ» ។

ចេស្ស៊ីកា ឈិន មកពី KMT បាននិយាយថា កំណែទម្រង់នេះគឺមានគោលបំណងផ្តល់នូវការត្រួតពិនិត្យផ្នែកនីតិប្រតិបត្តិកាន់តែប្រសើរឡើង។ ចំណែក DPP មិនចង់ឲ្យរឿងនេះកន្លងហួសទេ ព្រោះគេតែងតែទម្លាប់មានអំណាចផ្តាច់មុខ ៕