សហរដ្ឋអាមេរិកមានការព្រួយបារម្ភអំពីចិន «ផលិតទំនិញហួសប្រមាណ» និងបន្ទាប់មកនាំចេញទៅលក់នៅបរទេសក្នុងតម្លៃថោក ដែលនឹងបង្កើតឥទ្ធិពលលើមាត្រដ្ឋានសកល នេះអាចបណ្តាលឱ្យបណ្តាប្រទេសជុំវិញពិភពលោកការពារខ្លួន ដោយការកសាងរបាំងដើម្បីរារាំងផលិតផលរបស់ចិន ដែលមិនល្អសម្រាប់បរិយាកាសពាណិជ្ជកម្ម ។ ដោយហេតុនេះហើយ កាលសប្តាហ៍ទី ២ ខែឧសភានេះ ប្រធានាធិបតី ចូ បៃដេន បានប្រកាសដំឡើងពន្ធយ៉ាងធ្ងន់លើទំនិញពីប្រទេសចិន ។
នោះគឺការដំឡើងពន្ធទៅលើរថយន្តអគ្គិសនីពីប្រទេសចិន 4 ដងពី 25% ទៅ 100% ដំឡើងពន្ធលើបន្ទះស្រូបពន្លឺព្រះអាទិត្យពី 25% ទៅ 50% និងប្រភេទដែក រួមទាំងអាលុយមីញ៉ូមមួយចំនួន បានកើនឡើងច្រើនជាង 3 ដងពី 7,5% ទៅ 25% នៃថ្មលីចូមសម្រាប់រថយន្ត EV និងថ្ម Lithium សម្រាប់កម្មវិធីផ្សេងទៀតពី 7.5% ទៅ 25% ឧបករណ៍អេឡិចត្រូនិច ពី 25% ទៅ 50% ។ល។ សរុបទៅ វានឹងមានផលប៉ះពាល់ដល់ការនាំចូលពីប្រទេសចិនដែលមានតម្លៃ 18 ពាន់លានដុល្លារ ។
លោក បៃដេន និយាយថា ប្រទេសចិនផ្គត់ផ្គង់ប្រាក់ឧបត្ថម្ភយ៉ាងច្រើនដល់ផលិតផលទាំងនេះ ដែលជាការជំរុញឱ្យក្រុមហ៊ុនផលិតផលច្រើនពេក លើសទីផ្សារអាចស្រូបយកបាន។ បន្ទាប់មក វាបានបោះចោលផលិតផលទៅលើទីផ្សារពិភពលោកក្នុងតម្លៃទាប ដែលមិនយុត្តិធម៌។ លោកថា «នៅពេលអ្នកប្រើយុទ្ធសាស្ត្របែបនេះ វាមិនមែនជាការប្រកួតប្រជែងទេ ប៉ុន្តែវាជាការបោកប្រាស់»។
មុននឹងប្រកាសដំឡើងពន្ធនេះ រដ្ឋមន្ត្រីរតនាគារអាមេរិក ចានេត យេលលេន (Janet Yellen) បានធ្វើទស្សនកិច្ចនៅទីក្រុងប៉េកាំងកាលដើមខែមេសា ដែលកន្លងមកបានផ្ញើសារផ្ទាល់ទៅកាន់ប្រទេសចិនអំពីការផលិតទំនិញហួសកម្រិត ជាពិសេសផលិតផលថាមពលស្អាត ដូចជា បន្ទះស្រូបពន្លឺព្រះអាទិត្យ និងរថយន្តអគ្គិសនី ។
ទោះយ៉ាងណាក៏ដោយ ការកើនឡើងពន្ធនេះ បន្ថែមពីលើការការពារឧស្សាហកម្មអាមេរិកដែលជាហេតុផលស្របច្បាប់ និងមិនអាចបដិសេធបានទេថា រឿងនយោបាយលាយឡំគ្នាដែរ ព្រោះការបោះឆ្នោតប្រធានាធិបតីអាមេរិកខិតជិតមកដល់ខែវិច្ឆិកាខាងមុខនេះ ហើយគណបក្សប្រជាធិបតេយ្យកំពុងធ្វើយុទ្ធនាការលើការវិនិយោគហេដ្ឋារចនាសម្ព័ន្ធដ៏ធំ រួមទាំងថាមពលស្អាត ។ ការប្រកាសពន្ធនេះ យ៉ាងហោចណាស់ជួយការពារលំហូរចូលទំនិញថោកៗពីប្រទេសចិនភ្លាមៗ និងច្រើនហួសប្រមាណ ដែលសហរដ្ឋអាមេរិកមិនទាន់ត្រៀមខ្លួនរួចរាល់នៅឡើយ ។
អ្នកវិភាគគិតដូច្នេះថា ទោះបីជាការដំឡើងពន្ធលើទំនិញចិននឹងជួយឱ្យរដ្ឋាភិបាលអាមេរិកក្រោមការដឹកនាំរបស់លោក បៃដេន រក្សាជំហរតឹងតែងលើប្រទេសចិន ប៉ុន្តែវាក៏មានផលប៉ះពាល់ដោយអចេតនាលើសេដ្ឋកិច្ចអាមេរិក និងអ្នកប្រើប្រាស់ផងដែរ។ ពីមុនក្រុមហ៊ុន Goldman Sachs បានប៉ាន់ប្រមាណថា រាល់ការកើនឡើងពន្ធ 1% នឹងកាត់បន្ថយផលិតផលក្នុងស្រុកសរុបរបស់សហរដ្ឋអាមេរិក 0.03% បង្កើនការចំណាយរបស់អតិថិជន 0.1% និងបង្កើនអតិផរណាសម្រាប់រយៈពេលមួយឆ្នាំ។
អតិផរណាជាបញ្ហាធំមួយនៅអាមេរិកដែលបានរក្សាធនាគារកណ្តាល (Fed) មិនអាចបន្ថយការប្រាក់ រហូតមកដល់ពេលនេះ ប៉ុន្តែមន្ត្រីជាន់ខ្ពស់ក្នុងរដ្ឋាភិបាលអាមេរិកបានបញ្ជាក់ថា «នឹងមិនមានផលប៉ះពាល់លើអតិផរណា» ទេ ព្រោះវាជាការដំឡើងពន្ធលើវិស័យជាក់លាក់ ដូច្នេះវានឹងមិនមានផលប៉ះពាល់ទូលំទូលាយដល់សេដ្ឋកិច្ចអាមេរិកនោះទេ មិនបង្កើនការចំណាយលើអ្នកប្រើប្រាស់ វាខុសពីសំណើរបស់បេក្ខជនប្រធានាធិបតីគណបក្សសាធារណរដ្ឋលោក ដូណាល់ ត្រាំ ស្នើដំឡើងពន្ធលើទំនិញទាំងអស់ពីប្រទេសចិន និងគ្រប់ប្រទេស ១០%។
លោក ម៉ាក ហ្គីតេនស្តេន ឯកអគ្គរដ្ឋទូតសហរដ្ឋអាមេរិកប្រចាំសហភាពអឺរ៉ុប ផ្តល់បទសម្ភាសន៍ដល់សារព័ត៌មានអាមេរិកថា ប្រទេសចិនមានចេតនាបង្ខូចទ្រង់ទ្រាយទីផ្សារជាមួយនឹងផលិតផលថោកៗជាច្រើន គេបំផ្លាញសេដ្ឋកិច្ចរបស់អឺរ៉ុប និងសហរដ្ឋអាមេរិក យើងត្រូវការពារសេដ្ឋកិច្ចរបស់យើង និងកម្មករដែលកំពុងរងការវាយប្រហារពីប្រទេសចិន ។
អ្នកសេដ្ឋកិច្ចជាច្រើនរំពឹងទុកបែបនេះថា ការដំឡើងពន្ធនឹងមានផលប៉ះពាល់តិចតួចបំផុតលើ GDP របស់សហរដ្ឋអាមេរិក រួមទាំងអតិផរណា និងគោលនយោបាយរូបិយវត្ថុ ដូច្នេះហើយ វានឹងមិនបណ្តាលឱ្យមានការផ្លាស់ប្តូរណាមួយនៅក្នុងគោលនយោបាយរូបិយវត្ថុឡើយ ប៉ុន្តែវាជាសញ្ញាព្រមានថា ជម្លោះសេដ្ឋកិច្ចរវាងប្រទេសទាំងពីរនឹងអូសបន្លាយពេលយូរ ។
ទាំង ត្រាំ និង បៃដេន ដែលនឹងក្លាយជាគូប្រជែងប្រធានាធិបតីក្នុងការបោះឆ្នោតនាពេលខាងមុខនេះ សុទ្ធតែមានគោលជំហររឹងមាំដូចគ្នាចំពោះចិន ។ រដ្ឋបាលពីមុនរបស់លោក ត្រាំ បានដំឡើងពន្ធលើទំនិញពីប្រទេសចិន និងដៃគូពាណិជ្ជកម្មផ្សេងទៀតដែលមានតម្លៃ 300 ពាន់លានដុល្លារនៅចន្លោះឆ្នាំ 2018 និង 2019 ដែលនៅតែចូលជាធរមានមកដល់ថ្ងៃនេះ ហើយនៅក្នុងការបោះឆ្នោតខាងមុខនេះ លោក ត្រាំ បានស្នើសុំពន្ធ 10% លើការនាំចូលពីគ្រប់ប្រទេសទាំងអស់ ដែលអ្នកសេដ្ឋកិច្ចបារម្ភថា នឹងជំរុញឱ្យមានអតិផរណា និងធ្វើឱ្យប្រជាជនអាមេរិកបាត់បង់ការងារ ៕
ពី prachachat
ដោយ សូរ្យសែង