បកប្រែពី sanook
ដោយ សាវុឌ្ឍ៖
កាហ្វេត្រូវបានគេចាត់ទុកថា ជាភេសជ្ជៈដ៏ពេញនិយមបំផុតមួយនៅក្នុងពិភពលោក។ មនុស្សជាច្រើនផឹកកាហ្វេដើម្បីធ្វើឱ្យខ្លួនឯងស្រស់ស្រាយនៅពេលព្រឹក និងផ្តល់ថាមពលដល់រាងកាយ។ ទោះបីផឹកកាហ្វេ ល្អជាមួយអាហារជាច្រើនក៏ ដោយ ប៉ុន្តែមានអាហារ ៤ មុខ ដែលគួរចៀសវាងកុំញាំព្រមជាមួយកាហ្វេ ។ ដើម្បីការពារផលប៉ះពាល់ចំពោះសុខភាព អ្នកជំនាញខាងអាហារូបត្ថម្ភបង្ហាញអាថ៌កំបាំងដូចខាងក្រោមៈ
១. កាហ្វេជាមួយសាច់សត្វ
ទោះបីជាវាជាទម្លាប់ប្រចាំថ្ងៃសម្រាប់មនុស្សជាច្រើនក៏ដោយ ប៉ុន្តែការផឹកកាហ្វេព្រមជាមួយនឹងការបរិភោគសាច់ វាមិនមែនជាជម្រើសដ៏ល្អទេ ដោយសារតែកាហ្វេមានសារធាតុតានីន (Tannins) ដែលភ្ជាប់ជាមួយសារធាតុរ៉ែផ្សេងៗរកឃើញនៅក្នុងសាច់ ប៉ះពាល់ដល់ការបញ្ចេញជាតិស័ង្កសីពីរាងកាយ។ ស័ង្កសីគឺជាសារធាតុរ៉ែដ៏សំខាន់សម្រាប់រាងកាយក្នុងការបំពេញមុខងារ ដូច្នេះហើយអ្នកជំនាញណែនាំឲ្យចៀសវាងការផឹកកាហ្វេបន្ទាប់ពីទទួលទានសាច់ដែលមានជាតិស័ង្កសីខ្ពស់ ដូចជា សាច់ក្រហម អយស្ទ័រ បក្សី និងបង្គា ជាដើម ព្រោះអាហារទាំងនេះមិនត្រូវធាតុជាមួយកាហ្វេទេ ។
២. កាហ្វេជាមួយពពួកទឹកដោះគោ
កាហ្វេដាក់ទឹកដោះគោ ត្រូវបានគេចាត់ទុកថាជាជម្រើសភេសជ្ជៈដ៏ពេញនិយម។ មនុស្សជាច្រើនចូលចិត្តលាយបញ្ចូលគ្នា (កាហ្វេទឹកដោះគោ) ទោះវាជួយកាត់បន្ថយភាពចត់ល្វីង និងធ្វើឱ្យក្រពះមានអារម្មណ៍ឆ្អែត តែទោះយ៉ាងណា ផឹកកាហ្វេជាមួយពពួកទឹកដោះគោ មិនផ្តល់ផលល្អចំពោះសុខភាពទេ ព្រោះកាហ្វេមានសារធាតុដែលប៉ះពាល់ដល់ការស្រូបយកជាតិកាល់ស្យូមរបស់រាងកាយ ដែលកាល់ស្យូមត្រូវបានបញ្ចេញនៅក្នុងទឹកនោម។
ម្យ៉ាងទៀត ចៀសវាងការផឹកកាហ្វេព្រមជាមួយផលិតផលទឹកដោះគោផ្សេងទៀត ដូចជា ក្រែម ការ៉េម ជាដើម ។ ដើម្បីសុខភាពល្អ ត្រូវបំបែកការផឹកកាហ្វេពីផលិតផលទឹកដោះគោ វានឹងជួយឱ្យរាងកាយទទួលបានអត្ថប្រយោជន៍យ៉ាងពេញលេញពីជាតិកាល់ស្យូម ។
៣. កាហ្វេជាមួយអាហារចៀន បំពង
មនុស្សជាច្រើនចូលចិត្តញ៉ាំរបស់បំពង ចៀន ជាមួយកាហ្វេ ការពិតមិនល្អទេ វាប៉ះពាល់ដល់សុខភាព។ អាហារចៀនច្រើនតែសម្បូរទៅដោយខ្លាញ់អាក្រក់ និងកូឡេស្តេរ៉ូល ពេលញ៉ាំជាមួយកាហ្វេ វា នឹងធ្វើឱ្យកម្រិតកូឡេស្តេរ៉ូលអាក្រក់ (LDL) ក្នុងខ្លួនឡើងខ្ពស់ វាក៏អាចធ្វើឱ្យអ្នកមានអារម្មណ៍មិនស្រួល និងហើមពោះផងដែរ ។
ជម្រើសល្អ ផឹកកាហ្វេជាមួយទឹកផ្លែក្រូច មិនថាផ្លែក្រូចផ្អែម ក្រូចឆ្មា ឬផ្លែឈើផ្សេងទៀត ដូចជា ផ្លែឡេម៉ុន ទំពាំងបាយជូ ផ្លែ apricots ចេក និងម្នាស់ ជាដើម។ ផ្លែឈើទាំងនេះផឹកព្រមជាមួយកាហ្វេគឺល្អ ដែលជួយប្រឆាំងនឹងភាពល្វីងជូរចត់ និងសម្បូរទៅដោយវីតាមីន សារធាតុរ៉ែ និង សារធាតុប្រឆាំងអុកស៊ីតកម្មផងដែរ។
៤. កាហ្វេនិងស៊ុតឆ្អិន
ផឹកកាហ្វេញ៉ាំជាមួយស៊ុតឆ្អិន វាអាចប៉ះពាល់ដល់ការស្រូបយកជាតិដែកពីស៊ុត ដោយសារតែសារធាតុផ្សំក្នុងប្រភេទកាហ្វេខ្លះ ដើម្បីប្រតិកម្មជាមួយនឹងសារធាតុស្ពាន់ធ័រនៅក្នុងស៊ុតឆ្អិន ជាលទ្ធផលរារាំងការស្រូបយកជាតិដែក ៕