អត្ថបទ សូរ្យរិទ្ធ៖
ប្រធានាធិបតីរុស្ស៊ី លោក វ្ល៉ាឌីមៀ ពូទីន នឹងធ្វើទស្សនកិច្ចនៅទីក្រុងហាណូយនៅថ្ងៃស្អែកនេះ (១៩ មិថុនា) ដែលសង្កត់ធ្ងន់លើភក្តីភាពរបស់វៀតណាមចំពោះរុស្ស៊ី តែត្រូវទទួលនូវការរិះគន់ពីសហរដ្ឋអាមេរិកទៅវិញ ។
ដំណើរទស្សនកិច្ចនេះធ្វើឡើង បន្ទាប់ពីទីក្រុងហាណូយបានគេចពីជំនួបកំពូលសន្តិភាពអ៊ុយក្រែនក្នុងប្រទេសស្វីស កាលពីចុងសប្តាហ៍មុន ស្របពេលបានបញ្ជូនអនុរដ្ឋមន្ត្រីការបរទេសទៅចូលរួមកិច្ចប្រជុំ BRICS នៅរុស្ស៊ីនៅដើមសប្តាហ៍នេះ ហើយត្រូវបានគេរំពឹងថានឹងជួបជាមួយប្រធានាធិបតីថ្មីរបស់វៀតណាម លោក តូ ឡាំ និងអ្នកដឹកនាំផ្សេងទៀត ។
តើនេះមានន័យថាវៀតណាមឈប់«លេងចូល»អាមេរិក ហើយងាកទៅលេងចូលរុស្ស៊ីវិញឬ? ដូចជាមិនអញ្ជឹងទេ ! វៀតណាមឆ្លាត គេប្រើដៃឆ្វេងចាប់ជាមួយអាមេរិក ឯដៃស្តាំចាប់រលាក់ជាមួយរុស្ស៊ី ។ អ្វីដែលមានផលប្រយោជន៍ចំពោះប្រទេសគេ គេហ៊ានធ្វើបែបនេះ ។ ចំណែកសហភាពអឺរ៉ុប ក៏ជាដៃគូសេដ្ឋកិច្ចដ៏សំខាន់មួយទៀតដែររបស់វៀតណាម តែមិនបានធ្វើអត្ថាធិប្បាយលើដំណើរទស្សនកិច្ចនេះទេ ប៉ុន្តែបានសម្តែងការមិនពេញចិត្តកាលពីខែមុន ចំពោះការសម្រេចចិត្តរបស់វៀតណាម ក្នុងការពន្យារពេលកិច្ចប្រជុំជាមួយតំណាងសហភាពអឺរ៉ុបស្តីពីការដាក់ទណ្ឌកម្មប្រឆាំងនឹងរុស្ស៊ី ។
សម្រាប់អាមេរិក ដែលធ្លាប់ចាញ់សង្គ្រាមវៀតណាមក្នុងទសវត្សរ៍ ៧០ បានធ្វើឱ្យប្រសើរឡើងនូវទំនាក់ទំនងជាមួយគ្នាកាលពីឆ្នាំមុន ហើយកែច្នៃជាដៃគូពាណិជ្ជកម្មកំពូលរបស់វៀតណាម ។ អាមេរិកអាចអន់ចិត្តយ៉ាងខ្លាំងចំពោះទង្វើនេះ ។
អាមេរិកសេពគប់វៀតណាម មានហេតុផលពីរ ៖ ទី១. គិតរឿងពាណិជ្ជកម្ម និងសេដ្ឋកិច្ច ។ ទី២. រឿងនយោបាយ ទប់ចិត្តវៀតណាមកុំឲ្យងាកទៅចិន និងរុស្ស៊ី។ តែវៀតណាមចូលកៀកអាមេរិក ដើម្បីប្រើឥទ្ធិពលរឿងដែនទឹកនៅសមុទ្រចិនខាងត្បូង ដែលមានជម្លោះរ៉ាំរ៉ៃជាមួយគ្នា ។
អ្នកនាំពាក្យស្ថានទូតអាមេរិកបាននិយាយថា៖ «គ្មានប្រទេសណាគួរផ្តល់វេទិកាមួយដល់លោក ពូទីនដែលធ្វើសង្គ្រាមឈ្លានពាន និងអនុញ្ញាតឱ្យគាត់ប្រព្រឹត្តអំពើឃោរឃៅជារឿងធម្មតាទេ»!
តុលាការឧក្រិដ្ឋកម្មអន្តរជាតិ (ICC) បានចេញប្រកាសចាប់ប្រធានាធិបតីរុស្ស៊ី កាលពីខែមីនា ឆ្នាំ 2023 ពីបទឧក្រិដ្ឋកម្មសង្រ្គាមនៅអ៊ុយក្រែន ប៉ុន្តែវៀតណាម រុស្ស៊ី និងសហរដ្ឋអាមេរិក មិនមែនជាសមាជិកនៃ ICC ទេ។
តាមទស្សនៈរបស់ទីក្រុងហាណូយ ដំណើរទស្សនកិច្ចនេះមានគោលបំណងបង្ហាញថា វៀតណាមបន្តគោលនយោបាយការបរទេសប្រកបដោយតុល្យភាព។ លោក ឡាន ស្តូរេ អ្នកសិក្សាជាន់ខ្ពស់នៅវិទ្យាស្ថាន ISEAS-Yusof Ishak ក្នុងប្រទេសសិង្ហបុរី បាននិយាយថា វៀតណាមក៏ធ្លាប់ទទួលដំណើរទស្សនកិច្ចពីលោក ចូ បៃដេន និងលោក ហ្ស៊ី ជិនពីង ក្នុងប៉ុន្មានខែថ្មីៗនេះផងដែរ ។
នៅក្នុងដំណើរទស្សនកិច្ចផ្លូវការលើកដំបូងរបស់លោកទៅកាន់ប្រទេសវៀតណាមចាប់តាំងពីឆ្នាំ 2017 និងជាលើកទី ៥ របស់លោក លោក Putin ត្រូវបានគេរំពឹងថា នឹងប្រកាសពីកិច្ចព្រមព្រៀងក្នុងវិស័យជាច្រើនរួមមានពាណិជ្ជកម្ម ការវិនិយោគ បច្ចេកវិទ្យា និងការអប់រំ និងអាចរួមបញ្ចូលទាំងលក់អាវុធផង ។ រុស្ស៊ីគឺជាអ្នកផ្គត់ផ្គង់ថាមពលដ៏សំខាន់របស់វៀតណាម ជាមួយនឹងក្រុមហ៊ុនរុស្ស៊ីដែលកំពុងប្រតិបត្តិការក្នុងវិស័យប្រេង និងឧស្ម័នរបស់វៀតណាមនៅសមុទ្រចិនខាងត្បូង ដែលចិនទាមទារ ។
លោក ខាល ថាយើ អ្នកជំនាញសន្តិសុខជាន់ខ្ពស់បាននិយាយថា «ចំណុចពិភាក្សាសំខាន់ៗទាក់ទងនឹងការពង្រឹងទំនាក់ទំនងសេដ្ឋកិច្ច និងពាណិជ្ជកម្ម និងអាចនិយាយពីរឿងលក់អាវុធផង។
លោក ពូទីន និងមេដឹកនាំវៀតណាម ទំនងជាយល់ព្រមលើប្រតិបត្តិការប្រាក់រូប្លិ-ដុង តាមរយៈប្រព័ន្ធធនាគារ ។ លោក ថាយើ បានបញ្ជាក់ថា រូបិយប័ណ្ណទាំងពីរ អាចទូទាត់ថ្លៃទំនិញ និងសេវាកម្មផ្សេងៗ ៕