អត្ថបទ សូរ្យសែងៈ
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានបង្ហើបឱ្យដឹងថា ម៉ាឡេស៊ីបានសម្រេចចិត្តដាក់ពាក្យចូលជាសមាជិក BRICS ដែលនឹងចាប់ផ្តើមដាក់ឯកសារផ្លូវការក្នុងពេលឆាប់ៗនេះ ។
ការសម្រេចចិត្តនេះនៅក្នុងបទសម្ភាសន៍ជាមួយប្រព័ន្ធផ្សព្វផ្សាយចិន Guancha ដែលបានចេញផ្សាយកាលពីថ្ងៃទី ១៦ មិថុនាថា «គោលនយោបាយរបស់យើងគឺច្បាស់លាស់ ហើយយើងបានធ្វើការសម្រេចចិត្តមួយ នឹងចាប់ផ្តើមដំណើរការជាផ្លូវការក្នុងពេលឆាប់ៗនេះ» លោក អាន់វ៉ារ បាននិយាយថា «យើងកំពុងរង់ចាំលទ្ធផលចុងក្រោយ និងការឆ្លើយតបពីរដ្ឋាភិបាលអាហ្វ្រិកខាងត្បូង» ។
លោក អានវ៉ារ ក៏បានសំដៅទៅលើការពិតដែលលោកបានលើកបញ្ហាជាមួយប្រធានាធិបតីប្រេស៊ីល Luiz Inácio Lula da Silva កាលមិនយូរប៉ុន្មាន ខណៈពេលដែលអង្គការនេះត្រូវបានបង្កើតឡើងដោយប្រេស៊ីល(Brasil) រុស្ស៊ី (Russia) ឥណ្ឌា (India) និងចិន (China) ក្នុងឆ្នាំ 2016 ឯអាហ្រ្វិកខាងត្បូងបានចូលរួមនៅឆ្នាំ 2011 ។ គិតត្រឹមខែមករា ឆ្នាំ 2024 BRICS បានទទួលយកប្រទេសអេហ្ស៊ីប អេត្យូពី អ៊ីរ៉ង់ និងអេមីរ៉ាត់អារ៉ាប់រួម ជាផ្លូវការហើយ ប៉ុន្តែឈ្មោះដដែលនេះនៅតែប្រើរហូតដល់សព្វថ្ងៃ ។
លទ្ធភាពដែលម៉ាឡេស៊ីចូលរួមក្នុងក្រុម ចាត់ទុកថាមានសារៈសំខាន់ជាយុទ្ធសាស្ត្រ ។ ម៉ាឡេស៊ីជាប្រទេសមួយក្នុងចំណោមប្រទេសផ្លូវដឹកជញ្ជូនដ៏សំខាន់បំផុតរបស់ពិភពលោក ដែលជាច្រកសមុទ្រម៉ាឡាកា ភ្ជាប់ប៉ាស៊ីហ្វិកទៅមហាសមុទ្រឥណ្ឌា ។
«លោកខាងលិចចង់គ្រប់គ្រងសុន្ទរកថារបស់ពិភពលោក ប៉ុន្តែយើងមិនអាចទទួលយកវាទៀតទេ។ ព្រោះពួកគេលែងជាអំណាចអាណានិគមទៀតហើយ និងប្រទេសឯករាជ្យផ្សេងៗ ពួកគេគួរតែមានសេរីភាពក្នុងការបញ្ចេញមតិ» នាយករដ្ឋមន្ត្រីម៉ាឡេស៊ីបានប្រាប់ប្រព័ន្ធផ្សព្វផ្សាយក្នុងស្រុក។
មុននេះប៉ុន្មានថ្ងៃ លោក អ៊ីហ្គោរ ម៉ូហ្គូលូវ ឯកអគ្គរដ្ឋទូតរុស្ស៊ីប្រចាំនៅប្រទេសចិន បានប្រាប់គេថាប្រទេសប្រហែល 30 ហើយ បានបង្ហាញពីបំណងចង់ចូលរួមជាមួយ BRICS រួមទាំងប្រទេសថៃ ស្រីលង្កា និងវៀតណាម ដែលបានចាប់ផ្តើមបង្កើតពាក្យសុំចូលរួមក្រុមរួចហើយ ។
កិច្ចប្រជុំ BRICS ឆ្នាំ 2024 គ្រោងធ្វើនៅខែតុលា នៅទីក្រុងកាហ្សាន (Kazan) ប្រទេសរុស្ស៊ី បានបម្រើការជាប្រធានបង្វិលក្រុមចាប់តាំងពីខែមករាមក ៕