ចិនដាក់ផែនការ «ធ្វើកំណែទម្រង់ដ៏ធំ» មុនកិច្ចប្រជុំនយោបាយ
by Bong Rith:
AFP ចេញផ្សាយនៅថ្ងៃសៅរ៍ ទី 29 ខែមិថុនា ឆ្នាំ 2024 ថា ប្រធានាធិបតីចិន លោក ហ្ស៊ី ជិនពីងបានបង្ហើបថា បក្សកុម្មុយនិស្តកំពុងរៀបចំផែនការធ្វើកំណែទម្រង់សំខាន់ៗ នៅមុនសន្និបាត របស់គណបក្ស ។
អ្នកបង្កើតគោលនយោបាយចិនកំពុងព្យាយាមស្តារកំណើនប្រទេសឡើងវិញ ចាប់តាំងពីការបញ្ចប់វិធានការ COVID-19 ដ៏តានតឹងកាលពីចុងឆ្នាំ 2022 ។
ក្នុងរយៈពេលកន្លងមក ប្រទេសសេដ្ឋកិច្ចធំទីពីររបស់ពិភពលោកនេះ ត្រូវបានហ៊ុមព័ទ្ធដោយវិបត្តិបំណុលអចលនទ្រព្យ ការធ្លាក់ចុះនៃការប្រើប្រាស់ជាបន្តបន្ទាប់ និងអត្រាគ្មានការងារធ្វើរបស់មនុស្សជំនាន់ថ្មី ។
លោក ហ្ស៊ី បាននិយាយនៅក្នុងសុន្ទរកថាមួយកាលពីថ្ងៃសុក្រ ទី ២៨ មិថុនាថា បណ្តាអ្នកបង្កើតគោលនយោបាយគ្រោងនឹងចាត់វិធានការសំខាន់ៗ ដើម្បីជំរុញកំណែទម្រង់ស៊ីជម្រៅក្នុងលក្ខណៈទូលំទូលាយ ។ យើងនឹងបង្កើតបរិយាកាសធុរកិច្ចដែលផ្តោតលើទីផ្សារ កែសម្រួលបទប្បញ្ញត្តិ ឲ្យក្លាយជាទិសដៅនៅបរទេសកាន់តែខ្លាំងឡើង ។ «ទ្វាររបស់ប្រទេសចិននឹងបើកកាន់តែច្រើនឡើង»។
លោក ហ្ស៊ី បាននិយាយម្តងហើយម្តងទៀត នូវការប្តេជ្ញាចិត្តរបស់គាត់ចំពោះកំណែទម្រង់សំខាន់ៗនៅឆ្នាំនេះ ហើយរដ្ឋាភិបាលបានចេញវិធានការរួចហើយក្នុងវិស័យសំខាន់ៗមួយចំនួន ដូចជា វិស័យអចលនទ្រព្យ ។
កិច្ចប្រជុំលើកទី 3 នៃមហាសន្និបាតដែលនឹងកោះប្រជុំដើម្បីកំណត់ទិសដៅនៃគោលនយោបាយសេដ្ឋកិច្ចនឹងត្រូវធ្វើឡើងនៅទីក្រុងប៉េកាំង នាពាក់កណ្តាលខែកក្កដា។ គេរំពឹងថា នឹងដោះស្រាយភាពមិនច្បាស់លាស់ដែលប៉ះពាល់ដល់សេដ្ឋកិច្ចរបស់ប្រទេសចិន ។
ធនាគារប្រជាជនចិន (PBOC) ដែលជាធនាគារកណ្តាលរបស់ប្រទេស សន្យាជំរុញការអនុវត្តគោលនយោបាយ និងវិធានការហិរញ្ញវត្ថុ ដែលរដ្ឋាភិបាលបានប្រកាស និងជំរុញឱ្យមានការអភិវឌ្ឍន៍ស្ថិរភាពនិងរឹងមាំនៃទីផ្សារអចលនទ្រព្យ។
ជាផ្នែកមួយនៃការថ្លែងសុន្ទរកថានៅមហាសាលប្រជាជនដ៏អស្ចារ្យក្នុងទីក្រុងប៉េកាំង លោក ហ្ស៊ី បានសរសើរប្រទេស ចិនថា ជាកម្លាំងសម្រាប់សន្តិភាពពិភពលោក ហើយទីក្រុងប៉េកាំងនឹងចាត់វិធានការស្ថាបនាលើជម្លោះអន្តរជាតិ ដូចជាតំបន់ហ្គាហ្សាស្ទ្រីប និងអ៊ុយក្រែន ។
ចិនត្រូវបានប្រទេសជាច្រើនរិះគន់ថា មិនថ្កោលទោសការឈ្លានពានរបស់រុស្ស៊ីលើអ៊ុយក្រែន ហើយត្រូវបានគេចោទប្រកាន់ថា ជារដ្ឋាភិបាលគាំទ្រក្រុងម៉ូស្គូ ទោះបីជារដ្ឋាភិបាលក្រុងប៉េកាំងតែងតែរក្សាអព្យាក្រឹតភាពរបស់ខ្លួនក៏ដោយ ។
ចំណែកជម្លោះរវាងអ៊ីស្រាអែល និងប៉ាឡេស្ទីន ប្រទេសចិនបានគាំទ្រដំណោះស្រាយរដ្ឋពីរអស់រយៈពេលជាច្រើនទសវត្សរ៍ មកហើយដែរ ៕
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម