ដោយ សូរ្យសែង៖
ទីភ្នាក់ងារសារព័ត៌មានបរទេសបានរាយការណ៍ថា លោកស្រី វីហ្គោណា ហ្គោមេស (Vigona Gomez) ភរិយារបស់លោកនាយករដ្ឋមន្ត្រី ពេដ្រូ សាន់ឆេស (Pedro Sanchez) នៃប្រទេសអេស្ប៉ាញ បានទៅបង្ហាញខ្លួននៅតុលាការទីក្រុងម៉ាឌ្រីត កាលពីថ្ងៃទី ៥ ខែកក្កដា ឆ្នាំ ២០២៤ ក្រោយបានការស៊ើបអង្កេតលើការចោទប្រកាន់ពីបទពាក់ព័ន្ធនឹងអំពើពុករលួយ ដែលប៉ះពាល់ដល់ការកាន់តំណែងរបស់លោកប្តី សាន់ឆេស ជានាយករដ្ឋមន្ត្រី។
សេចក្តីរាយការណ៍ព័ត៌មានបានឲ្យដឹងថា លោកស្រី ហ្គោមេស ប្រឈមមុខនឹងការចោទប្រកាន់ថា លោកស្រីបានប្រើប្រាស់ឥទ្ធិពលរបស់គាត់ក្នុងនាមជាភរិយារបស់នាយករដ្ឋមន្ត្រីដើម្បីធ្វើជំនួញឯកជន រួមទាំងការបង្កើតកម្មវិធីថ្នាក់អនុបណ្ឌិតនៅសាកលវិទ្យាល័យដែលគាត់បានគាំទ្រ និងអ្នកឧបត្ថម្ភ ។
ទោះយ៉ាងណាក៏ដោយ បន្ទាប់ពីតុលាការក្រុងម៉ាឌ្រីត បានស៊ើបអង្កេតរយៈពេលតែប៉ុន្មាននាទីប៉ុណ្ណោះ ក៏ត្រូវបានផ្អាក រួមជាមួយនឹងសវនាការថ្មីដែលគ្រោងធ្វើនៅថ្ងៃទី 19 ខែកក្កដាជំនួសវិញ។
ចំពោះរឿងក្តីពុករលួយនេះ វាមានផលប៉ះពាល់ដល់លោក សាន់ឆេស ដែលត្រូវប្រកាសឈប់បំពេញតួនាទីជានាយករដ្ឋមន្ត្រីរយៈពេល ៥ថ្ងៃ ដើម្បីពិចារណាថាត្រូវលាលែងពីតំណែងនាយករដ្ឋមន្ត្រី ឬយ៉ាងណាកាលពីខែមេសាកន្លងទៅ ប៉ុន្តែប្រាកដថា លោក ឆាន់ឆេស បានប្រកាសថា នឹងមិនលាលែងពីតំណែងទេ ៕