អត្ថបទ សូរ្យសែងៈ
កាសែត khaosod របស់ថៃចេញផ្សាយថ្ងៃនេះ (១៤ កក្កដា) ថា នាវិកថៃ ១៨នាក់ បានត្រឡប់មកផ្ទះវិញហើយ នេះបើតាមលោក នីខនដេច ផ្លានគុណ អគ្គនាយកនៃនាយកដ្ឋានព័ត៌មាន និងជាអ្នកនាំពាក្យក្រសួងការបរទេស ឲ្យដឹងតាមរយៈសេចក្តីថ្លែងការណ៍ស្តីពីវឌ្ឍនភាពរបស់អាជ្ញាធរកម្ពុជាក្នុងការដោះលែង នាវិកថៃ ១៨នាក់ ដែលត្រូវបានចាប់ខ្លួនចាប់តាំងពីថ្ងៃទី២៥ ខែឧសភា ឆ្នាំ២០២៤ ឱ្យត្រឡប់ទៅប្រទេសថៃវិញនៅថ្ងៃនេះ ។ ការដោះលែងជនជាតិថៃនេះគឺជាសមិទ្ធផលដ៏អស្ចារ្យក្នុងទំនាក់ទំនងជាមួយប្រទេសជិតខាង។
ក្រោយដំណើរទស្សនកិច្ចផ្លូវការនៅកម្ពុជារបស់លោក ម៉ារីស ស្ងៀមភង្ស រដ្ឋមន្ត្រីក្រសួងការបរទេសថៃ កាលនៅថ្ងៃទី២៧ ខែមិថុនា ដែលលោកបានលើកយកបញ្ហានេះជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។
ទន្ទឹមនឹងការស្នើសុំភាគីកម្ពុជា ពន្លឿនចំណាត់ការផ្លូវច្បាប់ ដើម្បីអនុញ្ញាតឲ្យនាវិកទាំងអស់ត្រឡប់ទៅប្រទេសថៃឱ្យបានឆាប់តាមដែលអាចធ្វើបាន ក្រុមនាវិកនេះ បានចាកចេញពីក្រុងព្រះសីហនុ ហើយនឹងត្រឡប់ទៅប្រទេសថៃវិញ នៅរសៀលថ្ងៃនេះ (១៤ កក្កដា) តាមច្រកព្រំដែន បានហាតលេក ខេត្តត្រាត ។
គ្រប់ពេលដែលសមាជិកនាវិកទាំង១៨នាក់នៅប្រទេសកម្ពុជា ស្ថានទូតថៃប្រចាំរាជធានីភ្នំពេញ បានផ្តល់ជំនួយតាមមធ្យោបាយផ្សេងៗគ្រប់ពេលវេលា ព្រមទាំងមានមន្ត្រីកុងស៊ុលធ្វើដំណើរទៅបញ្ជូនពលរដ្ឋថៃមួយក្រុមតាមព្រំដែនកម្ពុជា។ ជាមួយគ្នានេះ ក្រសួងការបរទេសក៏នឹងបញ្ជូនប្រធានការិយាល័យលិខិតឆ្លងដែនទៅស្វាគមន៍អ្នកនៅព្រំដែនថៃផងដែរ។
លោក ម៉ារីស ក៏បាននិយាយផងដែរថា រដ្ឋាភិបាលថៃ សូមថ្លែងអំណរគុណចំពោះរដ្ឋាភិបាលកម្ពុជា ដែលបានជួយ និងពន្លឿនដំណើរការនេះ ដើម្បីឲ្យប្រជាជនថៃទាំងអស់អាចត្រឡប់មកប្រទេសវិញ និងបានជួបជុំគ្រួសាររបស់ពួកគេឡើងវិញ សកម្មភាពនេះឆ្លុះបញ្ចាំងពីទំនាក់ទំនងដ៏ល្អប្រសើរ និងជិតស្និទ្ធ ប្រទេសទាំងពីរក្នុងគ្រប់ទិដ្ឋភាព ៕