by Bong Rith 

«តំណក់ឈាម សង្គ្រោះជីវិត» មិនមែនជាចំណងជើងភាពយន្តទេ គឺជាមូលបទនៃ បេះដូងមនុស្សធម៌នៃការបរិច្ចាគឈាមដោយស្ម័គ្រចិត្ត សម្រាប់សង្គ្រោះជីវិតមនុស្ស របស់សមាជិក សមាជិកា សហភាពសហព័ន្ធយុវជនកម្ពុជា គ៧៨(ស.ស. យ.ក. គ៧៨) ចំនួន ១៧៦ រូប ប្រព្រឹត្តក្រោមអធិបតីដ៏ខ្ពង់ខ្ពស់របស់ កិត្តិនីតិកោសលបណ្ឌិត ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ នាព្រឹកថ្ងៃទី ១៧ ខែកក្កដា ឆ្នាំ ២០២៤ ។

អ្នកស្ម័គ្រចិត្តផ្ដល់ឈាម ចាត់ទុកជាវីរៈបុរស-នារីពិតៗ ដែលលះបង់ឈាមស្រស់ ដើម្បីសង្គ្រោះជីវិតអ្នកជំងឺនៅតាមមន្ទីរពេទ្យដែលត្រូវការឈាមជាចាំបាច់ដើម្បីរស់រានបន្ត ដូចនេះការបរិច្ចាគឈាមក្នុងម្នាក់ មួយប្លោក ជួយសង្គ្រោះជីវិតមនុស្ស គឺជាមនុស្សធម៌ដ៏ធំធេងណាស់ ។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមបានថ្លែងអំណរគុណចេញពីបេះដូងចំពោះសប្បុរសជន​បរិច្ចាគឈាម ដែលបានធ្វើអំណោយទានសម្រាប់ជីវិត និងបានធ្វើសកម្មភាពគ្រប់បែបយ៉ាង​​​ ដើម្បីលើកកម្ពស់ការបរិច្ចាគឈាមដោយស្ម័គ្រចិត្ដ មិនទទួលកម្រៃ​ រួមចំណែកជួយសង្គ្រោះជីវិតជនរងគ្រោះដោយក្ដីសប្បុរសបំផុត ។ លោកវេជ្ជបណ្ឌិតថា យុទ្ធនាការផ្តល់ឈាម មានអត្ថន័យ ២ ៖

១. បង្កើតទម្លាប់ និងវប្បធម៌នៃការបរិច្ចាគឈាមដោយស្ម័គ្រចិត្ត និងជម្រុញឲ្យយុវជនទូទៅ ចូលរួមការផ្តល់ឈាមនៅទូទាំងប្រទេស ដើម្បីធានាឲ្យមានឈាមគ្រប់គ្រាន់សម្រាប់អ្នកជំងឺដែលកំពុងត្រូវការឈាមចាំបាច់នៅគ្រប់មន្ទីរពេទ្យដោយគ្មានការរើសអើង មិនប្រកាន់ជាតិសាសន៍ និងសាសនា ។

២. ផ្សារភ្ជាប់សកម្មភាពនៃការបរិច្ចាគឈាមដោយស្ម័គ្រចិត្ត ទៅនឹងសកម្មភាពមនុស្សធម៌ដ៏ល្អប្រពៃក្នុងសង្គម ។

ពាក្យពេចន៍មួយឃ្លារបស់លោកវេជ្ជបណ្ឌិត សុខ ប៉ូ បានឲ្យចងចាំថា «កិច្ចបរិច្ចាគឈាមមិនប៉ះពាល់ដល់សុខភាពទេ ហើយឈាមមានប្រភពតែមួយគត់ គឺពីមនុស្ស មិនមានរោងចក្រណា ​ឱសថណា អាចផលិតបានទេ» ។

លោកវេជ្ជបណ្ឌិតឲ្យដឹងថា តម្រូវការឈាម​​ប្រចាំថ្ងៃ សរុបមាន​៣០០ទៅ៣៥០ប្លោកនៅរាជធានីភ្នំពេញ និង​ទូទាំងប្រទេស​​មានតម្រូវការប្រមាណ​ ១៤ម៉ឺនប្លោក​ ។ ដូច្នេះដោយសារតម្រូវការចាំបាច់ ស.ស.យ.ក. គ៧៨ ក៏ស្ម័គ្រចិត្តចាំបាច់ ចូលរួមជួយសង្គ្រោះជីវិតមនុស្ស ខ្មែរជួយខ្មែរ !

ឯកឧត្តម យ៉ិនទៀង ពុទ្ធិរិទ្ធ ប្រធាន ស.ស.យ.ក. គ៧៨ និងជាអ្នករៀបចំយុទ្ធនាការផ្តល់ឈាមនៅថ្ងៃនេះបានមានប្រសាសន៍ថា «តំណក់ឈាម សង្គ្រោះជីវិត» ធ្វើឡើងដើម្បីរួមចំណែកជាមួយឯកឧត្តម ឧបនាយករដ្ឋមន្ត្រី ហ៊ុន ម៉ានី ប្រធាន ស.ស.យ.ក. ដែលតែងយកចិត្តទុកដាក់ពីសកម្មភាពមនុស្សធម៌ និងសង្គម និងឲ្យយុវជនចេះចែករំលែកនូវក្តីស្រឡាញ់ទៅកាន់សង្គម តាមរយៈការបរិច្ចាគឈាម ផ្តើមចេញពីយើងម្នាក់ៗ ដើម្បីជួយជីវិតមនុស្ស ។ ឯកឧត្តម ពុទ្ធិរិទ្ធ ក៏បានលើកឡើងផងដែរថា «តំណក់ឈាម សង្គ្រោះជីវិត» គឺជាចលនាស្មារតីសាមគ្គីភាព និងជាការងារមនុស្សធម៌របស់យុវជន ដើម្បីបណ្តុះទម្លាប់នៃការបរិច្ចាគឈាម ឲ្យក្លាយជាវប្បធម៌ចែករំលែកនូវអំពើល្អក្នុងក្របខណ្ឌ ស.ស.យ.ក. គ៧៨ និងរបស់សប្បុរជនយើងទាំងអស់ផងដែរ» ។

ថ្ងៃនេះ ការបរិច្ចាគឈាមដោយស្ម័គ្រចិត្ត គឺជាអំពើបុណ្យដ៏ប្រពៃបំផុត ដែលនឹងប្រោះព្រំជីវិតអ្នកជំងឺឲ្យមានជីវិតស្រស់បំព្រង និងក្តីសង្ឃឹមជាថ្មី ។ មួយវិញទៀត ការបរិច្ចាគឈាម មិនត្រឹមតែជួយសង្គ្រោះជីវិតមនុស្សនោះទេ តែបានផ្ដល់អត្ថប្រយោជន៍ដល់សុខភាពរបស់ខ្លួនផងដែរ ដូចជា ជួយកាត់បន្ថយនូវហានិភ័យជំងឺមហារីកនានា កាត់បន្ថយកំហាប់ឈាម និងការលើសជាតិដែក ដែលធ្វើឱ្យមានការប៉ះពាល់ដល់ថ្លើម និងលំពែង ជួយធ្វើឱ្យប្រសើរឡើងនូវសុខភាពបេះដូង បន្ថយការឡើងទម្ងន់ ជំងឺដាច់សរសៃឈាមក្នុងខួរក្បាល និងធ្វើឱ្យមានភាពសប្បាយរីករាយផងដែរ ។

ដូច្នេះអំពើសប្បុរសធម៌ និងការងារសង្គមនេះ មិនសាបសូន្យទេ គឺយើងតែងតែបង្ហាញអំពីការទទួលខុសត្រូវសម្រាប់សង្គម ក្នុងការឆ្លើយតបទៅកាន់ការផ្តល់ជូនសង្គមរបស់ ស.ស.យ.ក. គ៧៨ និងអ្នកស្ម័គ្រចិត្តទាំងអស់ផងដែរ»៕

Photo by Ratha