ដោយ សូរ្យសែង៖

FBI កំពុងស៊ើបអង្កេតលើបញ្ហាភ្លើង​ឆេះ​ប្រអប់​បោះ​ឆ្នោត​ដំបូង​ចំនួន​ពីរ​ក្នុង​រដ្ឋ Oregon ដែលគេជឿថា មានមនុស្សដុត។

ទីភ្នាក់ងារសារព័ត៌មានបរទេសបានរាយការណ៍ អគ្គីភ័យបានឆាបឆេះនៅស្តង់បោះឆ្នោតមុនគេនៅទីក្រុង Portland រដ្ឋ Oregon និងនៅទីក្រុង Vancouver រដ្ឋ Washington នៅព្រឹកថ្ងៃចន្ទ ទី 28 ខែតុលា ឆ្នាំ 2024 ដែលមន្ត្រី FBI កំពុងដំណើរការការស៊ើបអង្កេតលើឧប្បត្តិហេតុនេះ និងឧប្បត្តិហេតុស្រដៀងគ្នាមួយទៀតដែលបានកើតឡើងកាលពីដើមខែនេះ នៅរដ្ឋវ៉ាស៊ីនតោន ។

ប៉ូលិស​បាន​និយាយ​ថា សម្ភារៈ​នេះ​បាន​មក​ពី​ឧបករណ៍​ដុត​ ហើយមន្ត្រីបានរកឃើញរថយន្ត​សង្ស័យ​មួយ​គ្រឿង​ត្រូវ​គេ​ឃើញ​បើក​គេច​ពី​កន្លែង​កើត​ហេតុ។

ក្នុងអំឡុងពេលថ្ងៃដដែល មាន​សេចក្តីរាយការណ៍​ថា អគ្គិភ័យ​បាន​ឆាបឆេះ​ប្រអប់​បោះ​ឆ្នោត​ទី​២ នៅ​ស្ថានីយ​រថយន្តក្រុង​។ ប៉ូលីសនៅទីក្រុង Vancouver រដ្ឋ Washington បាននិយាយថា ពេល​មក​ដល់​កន្លែង​កើតហេតុ ពួកគេ​បាន​ប្រទះ​ឃើញ​វត្ថុ​សង្ស័យ​មួយ​នៅ​ក្បែរ​ប្រអប់ដែលកំពុងឆេះ និងមានហុយផ្សែង ។

លោក Steve Bernd អ្នកនាំពាក្យរបស់ការិយាល័យស៊ើបអង្កេតសហព័ន្ធ (FBI) ទីក្រុង Seattle រដ្ឋ Washington បាននិយាយថា មន្ត្រីសហព័ន្ធកំពុងជួយប៉ូលីសក្នុងតំបន់ និងរដ្ឋ ក្នុងការស៊ើបអង្កេតរបស់ពួកគេ។

លោកស្រី Laura Shepard អ្នក​នាំ​ពាក្យ​ការិយាល័យ​រដ្ឋបាល​ទីក្រុង Vancouver បាន​និយាយ​ថា៖ មន្ត្រី​ការិយាល័យ​បោះឆ្នោត​ជំរុញ​ពលរដ្ឋ អ្នកដែលមកបោះឆ្នោតមុនម៉ោង 11:00 ព្រឹកថ្ងៃសៅរ៍ (26 តុលា) សូមទាក់ទង ដើម្បីពិនិត្យស្ថានភាពសន្លឹកឆ្នោត ។

ចំណែក​លោក Steve Hobbs រដ្ឋលេខាធិការ​នៃ​រដ្ឋ​វ៉ាស៊ីនតោន ថ្កោលទោស​ភ្លើង​ដែល​កើត​ឡើង ហើយ​បាន​ទទួល​ស្គាល់​ថា​សន្លឹក​ឆ្នោត​មួយ​ចំនួន​ត្រូវ​បាន​ខូច​ខាត «ខ្ញុំថ្កោលទោសយ៉ាងខ្លាំងចំពោះអំពើភេរវកម្មណាមួយ ដែលមានបំណងរំខានដល់ការបោះឆ្នោតដោយយុត្តិធម៌ និងស្របច្បាប់នៅក្នុងរដ្ឋវ៉ាស៊ីនតោន»៕

ប្រភព : cnn + Thairath