សត្វក្រៀលគឺជាប្រភេទសត្វដែលកំពុងរងការគំរាមគំហែងក្នុងពិភពលោក ទិន្នន័យជំរឿននៅឆ្នាំ២០២៣-២០២៤ កម្ពុជាកត់ត្រាបានតែ ១៧៨ ក្បាលប៉ុណ្ណោះ។ បច្ចុប្បន្ននេះក្រុមអភិរក្សសត្វក្រៀលកម្ពុជា បាននិងកំពុងធ្វើការអភិរក្សសត្វក្រៀលដែលមានវត្តមានទូទាំងប្រទេស។ នេះបើតាមការឱ្យដឹងអង្គការ NatureLife នៅថ្ងៃទី០៧ ខែវិច្ឆិកា ឆ្នាំ២០២៤ ។

ដោយឡែកក្នុងរដូវកាលបន្តពូជឆ្នាំ២០២៤ នេះ ក្រុមការងារអង្គការជីវិតធម្មជាតិនៅកម្ពុជាដែនជម្រកសត្វព្រៃលំផាត់បានធ្វើការយ៉ាងសកម្មក្នុងការអង្កេតតាមដានស្វែងរកសម្បុករបស់សត្វក្រៀល និងការការពារពិនិត្យតាមដានសម្បុកពងកូនរបស់ពួកវាក្នុងដែនជម្រកសត្វព្រៃនេះ។

ជាលទ្ធផលគិតមកត្រឹមខែតុលា ឆ្នាំ២០២៤ ក្រុមការងាររបស់អង្គការ NatureLife បានកត់ត្រាសម្បុករបស់សត្វក្រៀលចំនួន ៥សម្បុកហើយ មានកូនសរុបចំនួន ០៩ក្បាល បានហើរចេញពីសម្បុកដោយជោគជ័យក្នុងអត្រា១០០ភាគរយ ។

យោងតាមទិន្នន័យនេះបានបញ្ជាក់ឱ្យឃើញថា ចំនួនសម្បុកសត្វក្រៀលនៅដែនជម្រកសត្វព្រែដែលកំពុងអនុវត្តគម្រោងរេដបូកនេះ មានចំនួនថេរ បើប្រៀបធៀបទៅនឹងការរកឃើញឆ្នាំ២០២៣ កន្លងមក។ នេះបានបង្ហាញថា ដែនជម្រកសត្វព្រៃលំផាត់ គឺជាទីជម្រកដ៏សំខាន់របស់សត្វក្រៀលក្នុងការគាំទ្រដល់ការរស់រានមានជីវិតក្នុងរដូវមិនបន្តពូជ និងក្នុងរដូវបន្តពូជ ។

អង្គការជីវិតធម្មជាតិនៅកម្ពុជា (NatureLife Cambodia) បានបង្ហាញពីការរកឃើញសត្វក្រៀលចំនួន១៤ក្បាល ដែលក្នុងនោះ ជំទង់ចំនួន ៦ក្បាល អំឡុងពេលជំរឿនសត្វក្រៀលចុងក្រោយ សម្រាប់រដូវកាល២០២៣-២០២៤។

អង្គការមួយនេះបានបញ្ជាក់ថា ទិន្នន័យនេះបានបង្ហាញថា ចំនួនសត្វក្រៀល នៅក្នុងដែនជម្រកសត្វ ព្រៃលំផាត់គឺមានស្ថិរភាព បើធៀបទៅនឹងលទ្ធផលជំរឿន នៅក្នុងឆ្នាំ២០២២-២០២៣។ ប្រភពដដែល បានបញ្ជាក់ថា ការមកជួបជុំនៅដែនជម្រកសត្វព្រៃនេះក្នុងខែឧសភា សបញ្ជាក់ថាដែនជម្រកសត្វព្រៃលំ ផាត់ បាននិងកំពុងបន្តតួនាទីដ៏សំខាន់ ក្នុងការផ្តល់ទីជម្រកពងកូន ដល់សត្វកំពុងរងគ្រោះឈានទៅជិត ផុតពូជនេះ។

អង្គការជីវិតធម្មជាតិនៅកម្ពុជាបានបញ្ជាក់ដែរថា បច្ចុប្បន្ននេះក្រុមការងារ អង្គការរបស់ខ្លួន កំពុងកំណត់ និងដាក់ផែនការក្នុងការចុះសិក្សាស្វែងរកសម្បុកសត្វក្រៀល ដើម្បីបង្កើនភាពជោគជ័យនៃអត្រាពងកូន។ សូមជម្រាបជូនផងដែរថា ដែនជម្រកសត្វព្រៃលំផាត់ គឺទីតាំងពងកូនដ៏ សំខាន់របស់សត្វក្រៀល ដែល រដូវកាលរបស់សត្វនេះចាប់ពីខែឧសភាដល់ខែតុលា។

គួររំលឹកថា បើតាមឯកសារនៃក្រសួងបរិស្ថានបានឱ្យដឹងថា៖ សត្វក្រៀលគឺជាសត្វស្លាបដែលមានកម្ពស់ខ្ពស់ជាងគេលើពិភពលោក ហើយអាចហើរបានជាទូទៅមានកម្ពស់ប្រហែល ១,៧៦ម៉ែត្រ មានទម្ងន់ពី ៥-១២ គីឡូក្រាម និងប្រវែងស្លាបទាំងសងខាង ២,៥ម៉ែត្រ។ ពួកវាមានម្រាមជើងមុខវែងៗ ចំនួនបី និងម្រាមជើងក្រោយខ្លីមួយ។ ពួកវាមិនអាចទុំនៅលើដើមឈើបានទេ ហើយដេកដោយឈរ ស្ងៀមឆ្អឹងនៅទីតាំងជិតៗ កន្លែងរកចំណីរបស់វានៃតំបន់ដីសើម។ សត្វក្រៀលមានសម្បុរប្រផេះលើដងខ្លួន កផ្នែកខាងលើនិងក្បាលមានពណ៌ក្រហម ក្បាលផ្នែកខាងលើបំផុតនិងត្រចៀក មានពណ៌ប្រផេះ ស្រាល។ កូនក្រៀលមានមាឌតូចបន្តិច និងមានពណ៌ត្នោតនៅចំក្បាលរបស់វា។ យើងពិបាកសម្គាស់ថា សត្វក្រៀលណាជាឈ្មោលឬញីនៅពេលដែលពួកវានៅជាគូ ប៉ុន្តែមីញីមានមាឌ តូចជាងអាឈ្មោល បន្តិច។ សត្វក្រៀលត្រូវបានចាត់ជា ប្រភេទសត្វងាយរងគ្រោះ៕

ប្រភព៖ ទីភ្នាក់ងារសារព័ត៌មានកម្ពុជា