ប្រភព kapook

ដោយ សូរ្យរិទ្ធ

ដូណាល់ ត្រាំ ឬ ដូណាល់ ចន ត្រាំ (Donald John Trump)ជាបុគ្គលម្នាក់ដែលមានតួនាទីសំខាន់ក្នុងមជ្ឈដ្ឋានធុរកិច្ច និងនយោបាយរបស់សហរដ្ឋអាមេរិក ។ គាត់ជាអ្នកជំនួញអចលនទ្រព្យដ៏ល្បី និងឈានឆ្ពោះមកវេទិកានយោបាយ រហូតក្លាយជាប្រធានាធិបតីទី 45 ក្នុងឆ្នាំ ២០១៦ ក្នុងនាមគណបក្សសាធារណរដ្ឋ ។ ថ្ងៃនេះ មតិអ្នក សូមនាំប្រវត្តិលោក ត្រាំ តាំងពីវ័យក្មេង រហូតមកអង្គុយនៅសេតវិមាន ។

ជីវិតវ័យក្មេង និងគ្រួសារ

ដូណាល់ ត្រាំ កើតនៅថ្ងៃទី ១៤ ខែកក្កដា ឆ្នាំ ១៩៤៦ នៅតំបន់ឃ្វីន ទីក្រុងញូវយ៉ក ជាកូនទី ៤ ក្នុងចំណោមបងប្អូន ៥ នាក់ ។ ឪពុករបស់ឈ្មោះ ហ្វ្រិដ ត្រាំ (Fred Trump) ជាអ្នកជំនួញអចលនទ្រព្យល្បីឈ្មោះក្នុងទីក្រងញូវយ៉ក ។ ម្តាយឈ្មោះ ម៉ារី អ៊ែន ម៉ាកលីអូដ ត្រាំ (Mary Anne MacLeod Trump) ជាជនអន្តោប្រវេសន៍មកពីស្កុតលែន ជាគ្រួសារអ្នកមានទ្រព្យសម្បត្តិ ជំនួញបានផ្តោតលើការអភិវឌ្ឍន៍គម្រោងលំនៅដ្ឋានកម្រិតមធ្យមនៅ ឃ្វីន (Queens) និង ប៊្រូកលីន (Brooklyn) ។ ត្រាំ ជាមនុស្សមានវិន័យ និងឧស្សាហ៍ព្យាយាមតាំងពីក្មេង ។

ប្រវត្តិសិក្សា

កាលនៅវ័យកុមារ ត្រាំ មានភាពស្វាហាប់ និងមានទំនុកចិត្តខ្លួនឯង ប៉ុន្តែគាត់មានបញ្ហា អាកប្បកិរិយាខ្លះនៅពេលគាត់មានអាយុ 13 ឆ្នាំ ។ ឪពុកម្តាយរបស់គាត់បានសម្រេចចិត្តបញ្ជូនគាត់ទៅសិក្សានៅសាលាយោធាញូវយ៉ក ដើម្បីហ្វឹកហាត់វិន័យ និងគ្រប់គ្រងអាកប្បកិរិយារបស់គាត់។ ការសិក្សានៅសាលាយោធាបានជួយ ត្រាំ ឲ្យសម្របខ្លួនបានប្រសើរជាងមុន។ គាត់បានក្លាយជាអត្តពលិកឆ្នើម និងជាអ្នកដឹកនាំក្នុងចំណោមសិស្ស រហូតដល់បញ្ចប់ការសិក្សានៅឆ្នាំ 1964 ។

បន្ទាប់ពីបញ្ចប់ការសិក្សាពីមហាវិទ្យាល័យ Wharton ក្នុងឆ្នាំ 1968 ត្រាំ បានចូលរួមក្នុងអាជីវកម្មគ្រួសារ (Trump Management) ដែលបង្កើតឡើងដោយឪពុករបស់គាត់ ។ ការងារនេះ គាត់បានរៀនអំពីការអភិវឌ្ឍន៍អចលនទ្រព្យនៅ Brooklyn និង Queens  នេះគឺជាទីផ្សារដែលគ្រួសារ ត្រាំ មានជំនាញ។ ក្រោយមកនៅឆ្នាំ 1971 គាត់បានចូលកាន់តំណែងជាអ្នកគ្រប់គ្រងពេញលេញ ហើយបានប្តូរឈ្មោះក្រុមហ៊ុនទៅជា «អង្គការ ត្រាំ (Trump Organization)» និងពង្រីកអាជីវកម្មចូលទៅក្នុងទីផ្សារ Manhattan ។ នេះ​ជា​ការ​ចាប់​ផ្តើម​សាង​កេរ្តិ៍​ឈ្មោះ​ជា​អ្នក​អភិវឌ្ឍ​អចលន​ទ្រព្យ​លំដាប់​ពិភពលោក ។

គម្រោងមួយដែលធ្វើឱ្យលោក ត្រាំ ល្បីល្បាញខ្លាំង គឺការអភិវឌ្ឍន៍សណ្ឋាគារ Grand Hyatt ក្នុងឆ្នាំ 1976 នៅពេលគាត់បានទិញសណ្ឋាគារ Commodore ដែលមានសភាពទ្រុឌទ្រោមនៅជិត Grand Central Terminal ក្នុងទីក្រុងញូវយ៉ក ហើយបានសហការជាមួយក្រុមហ៊ុន Hyatt Corporation ជួសជុលសណ្ឋាគារនេះទៅជាសណ្ឋាគារប្រណីតលំដាប់ពិភពលោក។ គម្រោងនេះត្រូវបានគាំទ្រដោយរដ្ឋាភិបាលទីក្រុងញូវយ៉ក ដោយកាត់បន្ថយពន្ធរយៈពេល 40 ឆ្នាំ កាត់បន្ថយហានិភ័យ និងទាក់ទាញអ្នកវិនិយោគ ។ ក្នុងឆ្នាំ 1983 គាត់ក៏បានសាងសង់អគារ Trump Tower នៅលើ Fifth Avenue ដែលបានក្លាយជានិមិត្តរូបនៃភាពជោគជ័យរបស់គាត់ក្នុងវិស័យអចលនទ្រព្យ ។

ក្រៅពីជំនួញអចលនទ្រព្យ ត្រាំ ក៏បានពង្រីកអាណាចក្រអាជីវកម្មរបស់គាត់ទៅកាន់ឧស្សាហកម្មជាច្រើន ដូចជា កាស៊ីណូ ទីលានវាយកូនហ្គោល សណ្ឋាគារ និងកម្មវិធីប្រកួតបវរកញ្ញាចក្រវាឡ និងកម្មវិធីទូរទស្សន៍ ជាពិសេស រឿង The Apprentice ដែលចាក់ផ្សាយដំបូងក្នុងឆ្នាំ ២០០៤ បានធ្វើឲ្យគាត់ក្លាយជាមនុស្សល្បីល្បាញជុំវិញពិភពលោក។ ទោះ​បី​ជា​លោក​ជួប​បរាជ័យ​ក្នុង​មុខ​ជំនួញ​ជា​ច្រើន​ក៏​ដោយ រួមទាំងការប្រកាសក្ស័យធននៅក្នុងអាជីវកម្មកាស៊ីណូ ប៉ុន្តែ ត្រាំ បានរក្សារូបភាពនៃភាពជោគជ័យ និងពង្រីកម៉ាកយីហោ Trump ទៅកាន់គម្រោងជុំវិញពិភពលោក ។

ពី​អ្នក​ជំនួញ​ ក្លាយជា​ប្រធានាធិបតី

ដូណាល់ ត្រាំ បានចាប់ផ្តើមប្រឡូកនយោបាយដ៏ខ្លាំងក្លានៅក្នុងឆ្នាំ 2015 នៅពេលដែលគាត់បានប្រកាសពីបេក្ខភាពប្រធានាធិបតីសហរដ្ឋអាមេរិក។ ដោយសារតែមិនធ្លាប់មានបទពិសោធន៍នយោបាយពីមុន ប៉ុន្តែជាមួយនឹងពាក្យស្លោក «Make America Great Again (ធ្វើឱ្យអាមេរិកអស្ចារ្យម្តងទៀត)» ជាពាក្យមានអត្ថន័យ ហាក់ដូចជាការអំពាវនាវឱ្យសាធារណជនសហរដ្ឋអាមេរិកបើកភ្នែកមើលគាត់។

ឆ្នាំ ២០១៦ ជាពេលវេលារបស់លោក ត្រាំ ជាប្រធានាធិបតីគឺពោរពេញទៅដោយជម្លោះ និងការផ្លាស់ប្តូរគោលនយោបាយយ៉ាងឆាប់រហ័ស។ គោលនយោបាយសំខាន់ៗរបស់គាត់ រួមមាន ការកាត់បន្ថយពន្ធ សាងសង់ជញ្ជាំងនៅព្រំដែនម៉ិកស៊ិក និងការដកខ្លួនចេញពីកិច្ចព្រមព្រៀងអន្តរជាតិ ដូចជាកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ ។ ទោះជាយ៉ាងនេះក្តី អាណត្តិរបស់គាត់ក៏ត្រូវបានបំផ្លាញដោយការចោទប្រកាន់ និងបណ្តឹងផងដែរ រួម​ទាំង​ត្រូវ​បាន​ចោទ​ប្រកាន់ និង​ដក​ចេញ​ពី​មុខ​តំណែង​ពីរ​ដង ប៉ុន្តែ​នៅ​ទី​បំផុត គាត់​បាន​រួច​ផុត​ពី​ការ​ចោទ​ប្រកាន់​ទាំង​ពីរ​លើក ។

ទោះ​បី​ប្រឈម​មុខ​នឹង​បញ្ហា​ជា​ច្រើន​ក៏​ដោយ រួម​ទាំង​ការ​ចោទ​ប្រកាន់​ឧក្រិដ្ឋកម្ម និង​បណ្តឹង​ជា​ច្រើន​ទៀត ប៉ុន្តែ ត្រាំ មិន​បាន​បាត់​ខ្លួន​ពី​ឆាក​នយោបាយ​ឡើយ លោក​នៅតែ​មាន​ឥទ្ធិពល​នៅក្នុង​គណបក្ស​សាធារណរដ្ឋ ហើយ​រីករាយ​នឹង​ការគាំទ្រ​ពី​មូលដ្ឋាន​ដ៏​ស្មោះត្រង់​ ។ នៅក្នុង​ឆ្នាំ 2024 លោក ត្រាំ បាន​ប្រកាស​​ឈរឈ្មោះ​ជា​ប្រធានាធិបតី​ម្តងទៀត​ ដោយសង្កត់ធ្ងន់លើគោលនយោបាយដែលផ្តោតលើការធ្វើឱ្យសេដ្ឋកិច្ចរស់ឡើងវិញ ការបង្កើតការងារ និងការគ្រប់គ្រងអន្តោប្រវេសន៍ខុសច្បាប់។

ជ័យជម្នះលើក​នេះ​សម្រាប់​លោក ត្រាំ គឺ​ដូច​ដែល​លោក​ធ្លាប់​បាន​និយាយ​ថា​ ជា «ការ​វិល​វិញ​ដ៏​អស្ចារ្យ​បំផុត​ក្នុង​ប្រវត្តិសាស្ត្រ​នយោបាយ»។ លោក​ក្លាយជា​អតីត​ប្រធានាធិបតី​ដំបូង​គេ​ក្នុង​រយៈពេល​ជាង​ ១៣០​ឆ្នាំ​ដែល​ឈរឈ្មោះ​ម្តងទៀត​ បន្ទាប់​ពី​ចាញ់​ក្នុង​ការ​បោះ​ឆ្នោត​លើក​មុន។ ការត្រឡប់មកវិញនេះមិនត្រឹមតែឆ្លុះបញ្ចាំងពីសមត្ថភាពរបស់គាត់ក្នុងការរក្សាមូលដ្ឋានរបស់គាត់ប៉ុណ្ណោះទេ ប៉ុន្តែ​វា​ក៏​ជា​សក្ខីភាព​បញ្ជាក់​ពី​ភាព​ធន់​ និង​ការ​តាំងចិត្ត​ក្នុង​ការ​ស្ដារ​មុខមាត់​របស់​គាត់​ក្នុង​ក្រសែភ្នែក​សាធារណជន។

ជីវិតផ្ទាល់ខ្លួន និងគ្រួសារ

ដូណាល់ ត្រាំ បានរៀបការបីដង។ ភរិយាដំបូងរបស់គាត់គឺ Ivana Zelnickova ជាតារាម៉ូដែល និងអត្តពលិកជនជាតិឆេក ប្តីប្រពន្ធនេះបានរៀបការនៅឆ្នាំ 1977 ហើយមានកូនបីនាក់ គឺ Donald Trump Jr., Ivanka Trump និង A. Rick Trump (Eric Trump) ។ ពួកគាត់​បាន​បញ្ចប់​ការ​លែងលះ​គ្នា​ក្នុង​ឆ្នាំ 1992 បន្ទាប់​ពី​មាន​ព័ត៌មាន​លេច​ឡើង​អំពី​ភាព​មិន​ស្មោះ​ត្រង់​របស់ ត្រាំ ជាមួយ ម៉ារឡា ម៉ាផល (Marla Maples) ដែល​ក្រោយ​មក​បាន​រៀបការ​នៅ​ឆ្នាំ 1993 ហើយ​មាន​កូន​ស្រី​ម្នាក់​ឈ្មោះ ទីហ្វានី ត្រាំ (Tiffany Trump) អាពាហ៍ពិពាហ៍​ទី​ពីរ​បាន​បញ្ចប់​ក្នុង​ឆ្នាំ 1999 ។

ភរិយាបច្ចុប្បន្នរបស់លោក ត្រាំ គឺលោកជំទាវ មេឡានៀ ឃេនោស (Melania Knauss) អតីតតារាម៉ូដែលស្លូវេនី។ ប្តីប្រពន្ធនេះបានរៀបការនៅឆ្នាំ 2005 និងមានកូនប្រុសម្នាក់ឈ្មោះ Barron Trump កើតក្នុងឆ្នាំ 2006 ។ មេឡានៀ បានដើរតួយ៉ាងសំខាន់ក្នុងការគាំទ្រប្តីពេញមួយអាណត្តិរបស់គាត់ជាប្រធានាធិបតី ជាពិសេសក្នុងអំឡុងពេលយុទ្ធនាការបោះឆ្នោតលើកទីមួយ និងលើកទីពីរ ។ កូនប្រុសពៅរបស់លោក ត្រាំ គឺលោក Barron ក៏ទទួលបានការចាប់អារម្មណ៍ពីប្រព័ន្ធផ្សព្វផ្សាយផងដែរ ជាពិសេសនៅពេលដែលគាត់ធំឡើង និងក្លាយជាសកម្មជនក្នុងនយោបាយអំឡុងការបោះឆ្នោតឆ្នាំ 2024 ។

ទោះបីជាអាពាហ៍ពិពាហ៍របស់លោក ត្រាំ ពោរពេញដោយជម្លោះ និងពាក្យចចាមអារ៉ាមអំពីការប្រព្រឹត្តិខុសផ្លូវភេទក៏ដោយ ប៉ុន្តែ​គាត់​នៅ​តែ​ជា​បុគ្គល​តម្រង់​ទិស​គ្រួសារ កូនៗ​ទាំងអស់​របស់គាត់ ទាំងការដើរ​តួនាទី​សំខាន់​ទាំង​ផ្នែក​ជំនួញ និង​នយោបាយ ជាពិសេស​គឺ Donald Jr., Ivanka និង Eric ដែល​មើល​ថែ​អាជីវកម្ម​គ្រួសារ​បន្ទាប់​ពី ត្រាំ ចូល​ឆាក​នយោបាយ ។ រីឯ ទីហ្វានី និង បារ៉ុន បន្ត​ដឹកនាំជីវិតឯកជនកាន់តែច្រើន ។ 

វិថីជីវិតរបស់លោក ដូណាល់ ត្រាំ គឺពោរពេញទៅដោយបញ្ហាប្រឈម និងជោគជ័យ។ ពី​អ្នក​ជំនួញ​អចលន​ទ្រព្យ​ដ៏​មាន​ទ្រព្យ​សម្បត្តិ ទៅកាន់សេតវិមានប្រធានាធិបតីសហរដ្ឋអាមេរិក ទោះ​បី​ជា​ការ​កាន់​តំណែង​របស់​លោក​មាន​ភាព​ចម្រូងចម្រាស​ក៏​ដោយ ប៉ុន្តែ​គេ​មិន​អាច​បដិសេធ​បាន​ថា ​លោក​បាន​ដើរ​តួនាទី​យ៉ាង​សំខាន់​ក្នុង​ការ​ផ្លាស់​ប្តូរ​ទាំង​រង្វង់​ជំនួញ​និង​នយោបាយ​របស់​ប្រទេស​ក្នុង​ឆ្នាំ​២០២៤ ។  ការក្លាយជាប្រធានាធិបតីទី 47 របស់សហរដ្ឋអាមេរិក នេះគឺជាជំពូកថ្មីមួយនៅក្នុងជីវិតនយោបាយរបស់គាត់ដែលចាំបាច់ត្រូវក្រឡេកមើល ៕