ក្នុងឱកាសស្នាក់នៅខេត្តសៀមរាប ២ថ្ងៃកន្លះ (២៧-២៩ វិច្ឆិកា) គណៈប្រតិភូខេត្តយូណាន ដឹកនាំដោយលោក Wang Jianghua អនុលេខា គណៈកម្មាធិការអធិការកិច្ចវិន័យបក្សកុម្មុយនីស្តចិន ខេត្តយូណាន និងគណៈត្រួតពិនិត្យកិច្ចការរដ្ឋចិន ខេត្តយូណាន និងសហការី បន្ទាប់ពីជំនួបការងារជាមួយថ្នាក់ដឹកនាំអង្គភាពប្រឆាំងអំពើពុករលួយ បានអញ្ជើញទស្សនាប្រាង្គប្រាសាទខ្មែរ ដែលមួយឆ្នាំៗបានទាញយកបេះដូងភ្ញៀវអន្តរជាតិ មកទស្សនារាប់លាននាក់ ។ ដំណើរទស្សនាប្រាសាទ​នេះ​ អមដោយឯកឧត្តម ហេង សុខឃៀង ឧបការី អ.ប.ព. និងលោកបណ្ឌិត កេ វរជិរ៉ាវុធ ជំនួយការ កិត្តិនីតិកោសលបណ្ឌិត ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ ។

«លើវិស័យទេសចរណ៍ ខេត្តទាំងពីរ​មាន​សក្ដានុពល​ប្រហាក់​ប្រហែល​គ្នា​ ដោយ​ខេត្ត​សៀមរាប​សម្បូរ​ទៅ​ដោយ​ប្រាង្គ​ប្រាសាទ​បុរាណ និង​រមណីយដ្ឋាន​ធម្មជាតិ ។ ជាក់ស្តែង អ្វីដែលបានមកទស្សនាប្រាសាទលើទឹកដីខេត្តសៀមរាប ពិតជាមានការទាក់ទាញខ្លាំងណាស់ ពិតជាមានសក្តានុពលខ្លាំង» ។ ចំណែកខេត្ត​យូណាន ​មាន​ទីកន្លែង​កម្សាន្ត​ ដែល​មាន​វ័យ​ចំណាស់ ពឹងផ្អែក​តំបន់​ធម្មជាតិ​ព្រៃភ្នំ ​មាន​ទឹកធ្លាក់​ប្រកប​ដោយ​ធម្មជាតិ ហើយ​ជា​ខេត្ត​មាន​បទពិសោធន៍​លើ​វិស័យ​ទេសចរណ៍​​ផងដែរ»។​​​​​​ ​នេះជាប្រសាសន៍របស់លោក​​​ Wang Jianghua ក្នុងជំនួបទ្វេភាគី​ជាមួយអភិបាលរងខេត្តសៀមរាប លោក ឌី រ៉ាដូ នៅព្រឹកថ្ងៃទី ២៨ វិច្ឆិកា ។

លោក​​ Wang Jianghua មានប្រសាសន៍ថា​​​«​ចិននិងកម្ពុជា ​គឺជា​មិត្តដែកថែប យូរអង្វែង ​ហើយប្រជាជនទាំងពីរផឹកទឹកទន្លេមេគង្គជាមួយគ្នា» ។

ជាការឆ្លើយតបវិញ​​​​​​​​​​​​​​​​​ លោកអភិបាលរង លោក ឌី រ៉ាដូ បាន​ជម្រាបជូនភ្ញៀវថា ខេត្ត​សៀមរាប​​រក្សាបាននូវ​សន្តិសុខ និង​សុវត្ថិភាព​ជូន​ភ្ញៀវ​ទេសចរ​ជាតិ និង​អន្តរជាតិ ដែល​មក​ទស្សនា​​នៅ​តាម​តំបន់​រមណីយដ្ឋាន​វប្បធម៌ និង​ធម្មជាតិ​សំខាន់ៗ និង​វិនិយោគិន​ដែល​មក​វិនិយោគ​នៅ​ខេត្ត​នេះ​ ។ លោក ឌី រ៉ាដូ បានស្នើប្រតិភូចិនខេត្តយូណាន ជួយជំរុញភ្ញៀវ​ទេសចរចិនមកកម្សាន្តខេត្តសៀមរាបឲ្យបានច្រើន ព្រោះការផ្លាស់ប្តូរប្រជាជនទាំងពីរ ធ្វើឡើងចំពេលថ្នាក់ដឹកនាំទាំងពីរកំពុងតែពង្រីកទំនាក់ទំនងស៊ីជម្រៅជាមួយគ្នា ៕