សម្តេចធិបតី ហ៊ុន ម៉ាណែត រិះគន់«ព័ត៌មានក្លែងក្លាយ»អំពីការជួញដូរមនុស្ស ធ្វើឲ្យកម្ពុជាខូចកេរ្តិ៍ឈ្មោះ
ដោយ សូរ្យសែង៖
សម្តេចធិបតីនាយករដ្ឋមន្រ្តី ហ៊ុន ម៉ាណែត កាលពីថ្ងៃព្រហស្បតិ៍ ទី ១២ ខែធ្នូ ឆ្នាំ ២០២៤ បានអំពាវនាវឲ្យប្រជាពលរដ្ឋ និងស្ថាប័នពាក់ព័ន្ធរួមគ្នាការពារកេរ្តិ៍ឈ្មោះកម្ពុជា។ ជាមួយគ្នានោះ សម្តេចធិបតីក៏បានលើកឡើងថា មានការផ្សព្វផ្សាយព័ត៌មាន«ក្លែងក្លាយ»អំពីការជួញដូរមនុស្សក្នុងប្រទេសកម្ពុជា។ សម្តេចធិបតីថ្លែងបែបនេះ នៅក្នុងទិវាជាតិប្រយុទ្ធប្រឆាំងអំពើជួញដូរមនុស្ស នាថ្ងៃទី ១២ ខែធ្នូ ឆ្នាំ ២០២៤។
សម្តេចធិបតីលើកឡើងថា កម្ពុជាមិនដែលបដិសេធថាមិនមានអំពើជួញដូរមនុស្ស និងភាពអសន្ដិសុខក្នុងប្រទេសឡើយ ប៉ុន្តែ កម្ពុជាមានសុច្ឆន្ទៈនៅក្នុងការដោះស្រាយបញ្ហាទាំងអស់នោះ ។
«ថ្មីៗនេះ ក៏យើងមានបញ្ហាប្រឈមអាព័ត៌មានពិតក៏មាន អាក្លែងក្លាយក៏មាន ដែលធ្វើឲ្យយើងខូចឈ្មោះជាច្រើន។ កិច្ចការកន្លងទៅ កន្លែងខ្លះវាយតម្លៃទៅលើកម្ពុជាទៅលើការជួញដូរមនុស្ស ក៏មិនសុក្រឹតប៉ុន្មាន មិនយុតិ្តធម៌ប៉ុន្មានដែរ ចំពោះការខិតខំប្រឹងប្រែងរបស់យើង»។ សម្តេចធិបតីថ្លែង ។
.jpg)
ឯកឧត្តម ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ ថ្លែងក្នុងពិធីបើកកម្មវិធីទិវាជាតិប្រឆាំងការជួញដូរមនុស្សនោះថា បើទោះបទល្មើសនៃការជួញដូរមនុស្សនៅមិនទាន់បង្រ្កាបបានទាំងស្រុងនៅក្នុងប្រទេសកម្ពុជាក្តី ក៏សកម្មភាពបទល្មើសដែលបានរាយការណ៍នោះមានការថយចុះ ហើយត្រូវបានបង្ក្រាបទាន់ពេលវេលា ។
ឯកឧត្តមបន្ថែមថា ការផ្សព្វផ្សាយព័ត៌មានមិនពិត ឬការបញ្ចេញព័ត៌មានមិនមានការគ្រប់គ្រងត្រឹមត្រូវ ធ្វើឲ្យប៉ះពាល់ដល់កិតិ្តយសប្រទេស ដែលលោកថាជាការផ្ដល់ឱកាសឲ្យជនល្មើសរៀបចំវិធីសាស្រ្តរត់គេចខ្លួន និងស្វែងរកវិធីសាស្រ្តថ្មីៗ ដើម្បីប្រព្រឹត្តបទល្មើសបន្តទៀត ៕
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម