AFP និយាយនៅថ្ងៃទី ១៣ ខែធ្នូ ឆ្នាំ ២០២៤ ថា ក្រសួងការពារជាតិកម្ពុជាផ្សព្វផ្សាយឲ្យដឹងថា នាវាចម្បាំងរបស់សហរដ្ឋអាមេរិក នឹងចូលចតនៅកំពង់ផែក្រុងព្រះសីហនុនៅសប្តាហ៍ក្រោយ ដែលជាលើកដំបូងក្នុងរយៈពេល ៨ ឆ្នាំ ។

នៅក្នុងសេចក្តីថ្លែងការណ៍មួយ ក្រសួងការពារជាតិកម្ពុជា បាននិយាយថា ដំណើរទស្សនកិច្ចរបស់ USS Savannah ទៅកាន់កំពង់ផែក្រុងព្រះសីហនុ គឺក្នុងគោលបំណងពង្រឹង និងពង្រីកចំណងមិត្តភាព និងជំរុញកិច្ចសហប្រតិបត្តិការទ្វេភាគីរវាងកម្ពុជា និងសហរដ្ឋអាមេរិក ។

កន្លងមក ក្រុងវ៉ាស៊ីនតោន​បាន​ថ្លែង​ថា មូលដ្ឋានទ័ពជើងទឹករៀម អាចផ្តល់ឱ្យទីក្រុងប៉េកាំងនូវទីតាំងយុទ្ធសាស្ត្រដ៏សំខាន់មួយនៅក្នុងឈូងសមុទ្រថៃ នៅជិតសមុទ្រចិនខាងត្បូងដែលមានជម្លោះ ដែលចិនទាមទារសិទ្ធិភាគច្រើន ។ ប៉ុន្តែ​មន្ត្រីជាន់ខ្ពស់​កម្ពុជា​បាន​បដិសេធ​ម្តង​ហើយ​ម្តង​ទៀត​ថា មូលដ្ឋាន​នេះមិន​ត្រូវ​បាន​ប្រើ​ដោយ​មហាអំណាចណានោះទេ។

ក្រសួងការពារជាតិកម្ពុជានិយាយថា ចាប់តាំងពីឆ្នាំ ២០០៧ នាវាចម្បាំងរបស់កងទ័ពជើងទឹកអាមេរិកចំនួន ២៧ គ្រឿងបានចូលមកកំពង់ផែក្រុងព្រះសីហនុ ប៉ុន្តែ​ដំណើរ​នាវាលើកនេះមាន​រយៈពេល​ប្រាំ​ថ្ងៃ​នៅ​សប្តាហ៍​ក្រោយ​ ក្រោយខកខាន​ក្នុង​រយៈពេល​ប្រាំបី​ឆ្នាំ។

សមាជិកនាវិក 103 នាក់នៃ USS Savannah នឹងជួបជាមួយមេបញ្ជាការនៃមូលដ្ឋានទ័ពជើងទឹករៀម និងចូលរួមក្នុងសកម្មភាពផ្សេងៗ និងដើម្បីពង្រឹងការផ្លាស់ប្តូរវប្បធម៌ និងកិច្ចសហប្រតិបត្តិការគ្នា កម្ពុជា-អាមេរិក។

ការ​ប្រកាស​នេះ​ធ្វើ​ឡើង​បន្ទាប់​ពី​រដ្ឋមន្ត្រី​ការពារ​ជាតិ​អាមេរិក លោក Lloyd Austin មក​បំពេញ​ទស្សនកិច្ច​នៅ​កម្ពុជា​កាល​ពី​ខែ​មិថុនា ២០២៤ ក្នុង​គោល​បំណង​ស្ដារ​ទំនាក់​ទំនង​ជាមួយគ្នា ។

ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា និងលោក Bridget Walker មកពីស្ថានទូតសហរដ្ឋអាមេរិក អបអរសាទរចំពោះការស្តារឡើងវិញនូវទំនាក់ទំនងយោធារវាងប្រទេសទាំងពីរ ៕