ត្រីប្រាយក្សដ៏កម្រចំនួន ៦ក្បាល ត្រូវបានចាប់បាននៅក្នុងប្រទេសកម្ពុជាក្នុងរយៈពេល 5 ថ្ងៃ ដែលខ្លះមានទម្ងន់ជាង 120 គីឡូក្រាម ដែលនេះជាការបង្កើនក្តីសង្ឃឹមសម្រាប់ការរស់រានមានជីវិតនៃប្រភេទសត្វជិតផុតពូជ ដែលជាត្រីទឹកសាបដ៏ធំបំផុតមួយរបស់ពិភពលោក។

កាល​ពី​ថ្ងៃ ១០ ធ្នូ ត្រី​​ចំនួន ៣​ក្បាល ត្រូវ​បាន​ចាប់​បាន​ក្នុង​ទន្លេ​មេគង្គ​ក្នុង​ថ្ងៃ​តែ​មួយ វា​មាន​ទម្ងន់​ចន្លោះ​ពី ៩៥-១៣១ គីឡូក្រាម ២ ក្បាល​ទៀតមាន​ប្រវែង​ជាង ២ ម៉ែត្រ។

ត្រី​ប្រា​យក្ស​ទាំង​៣​ក្បាល ត្រូវ​បាន​គេ​វាស់ និង​ដាក់​ស្លាក មុន​នឹង​ត្រូវ​ព្រ​លែង​ឱ្យ​ចូល​ទឹកទន្លេធម្មជាតិវិញ ។ ក្រុមមន្ត្រីបានប្រមូលសំណាក DNA របស់ត្រីរក្សាទុក ។

គម្រោងអច្ឆរិយៈនៃមេគង្គ (Wonders of the Mekong) គឺជាគម្រោងអភិរក្សដែលផ្តល់មូលនិធិដោយសហរដ្ឋអាមេរិក។ គេ​បាន​បញ្ជាក់​ថា ត្រី​ជាច្រើន​ត្រូវ​បាន​ចាប់​បាន​ក្នុង​រយៈពេល​តែ​ប៉ុន្មាន​ថ្ងៃ​ប៉ុណ្ណោះ។ វា​ជា​ព្រឹត្តិការណ៍​មិន​គួរ​ឱ្យ​ជឿ និង​មិន​ធ្លាប់​មាន​ពី​មុន​មក ។

លោក Zep Hogen អ្នកជីវវិទូនៅសាកលវិទ្យាល័យ Nevada ទីក្រុង Reno ដែលដឹកនាំគម្រោងនេះបាននិយាយថា «ខ្ញុំមិនដែលឮរឿងនេះពីមុនមកទេ» ។

«ការដាក់ស្លាកត្រីទាំងនេះផ្តល់ឱ្យយើងនូវព័ត៌មានសំខាន់ៗអំពីបរិស្ថានវិទ្យា និងការផ្លាស់ទីជម្រករបស់វា ដើម្បីព្យាយាមជួយត្រីទាំងនេះឱ្យរស់រានមានជីវិតទៅអនាគត»។

នៅប៉ុន្មានថ្ងៃមុន ត្រី​យក្សចំនួន ​៣​ក្បាល​ទៀត ​ត្រូវ​បាន​គេ​ចាប់​បាន​ដែល​ត្រូវ​បាន​ដាក់​ស្លាក​ផង​ដែរ ហើយ​លែង​ចូល​ទន្លេ​វិញ​ មួយ​ត្រូវបាន​ដោះលែង​នៅ​ទន្លេមេគង្គ និង​ពីរ​ត្រូវបាន​ដោះលែង​នៅ​ទន្លេសាប​ក្បែរ​រាជធានី​ភ្នំពេញ​។

ត្រី​ប្រា​យក្ស​ខ្លះ​មាន​ទម្ងន់​ដល់​ទៅ​៣០០​គីឡូក្រាម និង​មាន​ប្រវែង​ ៣​ម៉ែត្រ ។ ត្រី​ប្រា​យក្ស​នេះ​បង្ហាញ​ពី​សកម្មភាព​ពង​កូន​នៅ​ទន្លេមេគង្គ​ក្នុង​ប្រទេស​កម្ពុជា និង​លទ្ធផល​នៃ​ការងារ​អភិរក្ស​រយៈពេល ២៥ ឆ្នាំ​ដោយ​ក្រុម​សហការ​ជាមួយ​អង្គការ​នេសាទ និង​សហគមន៍​មូលដ្ឋាន។

គម្រោងអច្ឆរិយៈនៃទន្លេមេគង្គ និយាយថា ការចាប់ត្រីយក្សបានបង្កើនក្តីសង្ឃឹមសម្រាប់ការរស់រានមានជីវិតនៃប្រភេទសត្វកម្រដែលកាន់តែខ្លាំងឡើង នៅក្នុងជម្រកជាច្រើន ក្នុងប្រទេសកម្ពុជា ៕