ល្បីពេញពិភពលោក! ប្រព័ន្ធផ្សព្វផ្សាយបរទេសរាយការណ៍អំពីវិបត្តិសំរាមនៅភូកេត ប្រទេសថៃ បង្កក្លិនស្អុយរំខានអ្នកស្រុក និងភ្ញៀវទេសចរណ៍

ព័ត៌មានអន្តរជាតិថ្ងៃសៅរ៍ ទី18 ខែមករា ឆ្នាំ2025 ម៉ោង 5:49 នាទី ល្ងាច

«ក្លិនស្អុយសំរាមខ្លាំង យើងត្រូវពាក់ម៉ាសគ្រប់ពេលវេលា ហើយយើងមិននៅខាងក្រៅទាល់តែសោះ «អ្វីដែលយើងអាចធ្វើបានគឺនៅតែផ្ទះ» សម្តីរបស់អ្នកស្រុកនៅលើកោះភូកេត ។

នៅជ្រុងមួយ ខេត្តភូកេត ប្រទេសថៃ ជាកន្លែងទាក់ទាញភ្ញៀវទេសចរចំនួន ៣៧ លាននាក់ ដោយបង្កើតប្រាក់ចំណូលបានជាង 1,67 ពាន់ពាន់លានបាត ប៉ុន្តែអ្វីដែលខេត្តភូកេតកំពុងប្រឈមខ្លាំង គឺវិបត្តិ «សំរាម» ។

ទីភ្នាក់ងារសារព័ត៌មាន Reuters បានរាយការណ៍ថា «ខេត្តសមុទ្រភូកេតកំពុងជួបវិបត្តិសំរាមដែលមានការកើនឡើង» ជារៀងរាល់ថ្ងៃ មានរថយន្តដឹកសំរាមទៅកន្លែងចាក់សំរាមធំៗ 1,200 តោនក្នុងមួយថ្ងៃ ។ ភូកេតអាចដុតកាកសំណល់បានត្រឹមតែ 700 តោនប៉ុណ្ណោះ ។

អ្នកភូមិដដែលបានឲ្យដឹងដែរថា ដើម្បីទប់ស្កាត់ក្លិនស្អុយ (ក្លិនសំរាម) ពួកគាត់ត្រូវបើកម៉ាស៊ីនត្រជាក់ និងរក្សាម៉ាស៊ីនបន្សុទ្ធខ្យល់គ្រប់ពេល ដែលបណ្តាលឱ្យវិក័យប័ត្រអគ្គិសនីរបស់គាត់កើនឡើងទ្វេដង។

លោក Suphot La-ongphet អភិបាលរងក្រុងភូកេតបានបង្ហើបថា ទេសចរណ៍នៅលើកោះកំពុងរីកចម្រើន ហើយនៅចុងឆ្នាំនេះ ភូកេតបង្កើតកាកសំណល់រហូតដល់ 1,400 តោនក្នុងមួយថ្ងៃ ។

Reuters បានសន្និដ្ឋានថា រដ្ឋាភិបាលកំពុងជំរុញផែនការកាត់បន្ថយកាកសំណល់ ១៥% ក្នុងរយៈពេលប្រាំមួយខែ ដោយពង្រីកកន្លែងចាក់សំរាម សាងសង់ឡដុតសំរាម និងរោងចក្រថាមពលកាកសំណល់ ដើម្បីធ្វើឱ្យភូកេតក្លាយជាគោលដៅទេសចរណ៍ប្រកបដោយនិរន្តរភាព ៕