អង្គការ UNICEF បង្ហាញ​ថា ការបម្រែបម្រួលអាកាសធាតុ បានប៉ះពាល់ដល់ការសិក្សារបស់កុមារជិត 250 លាននាក់មកពី 85 ប្រទេសទូទាំងពិភពលោកនៅឆ្នាំ 2024 ។

មូលនិធិកុមាររបស់អង្គការសហប្រជាជាតិ (UNICEF) បានចេញផ្សាយរបាយការណ៍មួយដោយបញ្ជាក់ថា៖ យ៉ាងហោចណាស់ ការអប់រំរបស់កុមារ 242 លាននាក់អាចត្រូវបានរំខានដោយរលកកម្តៅ ព្យុះស៊ីក្លូន ទឹកជំនន់ និងព្រឹត្តិការណ៍អាកាសធាតុធ្ងន់ធ្ងរផ្សេងទៀតដែលទាក់ទងនឹងការប្រែប្រួលអាកាសធាតុនៅឆ្នាំ 2024 ។

អាហ្វហ្គានីស្ថាន គឺជាប្រទេសមួយក្នុងចំណោមប្រទេសជាច្រើន ដែលប្រឈមនឹងការគំរាមកំហែងអាកាសធាតុខ្លាំង។ ប្រទេសនេះត្រូវបានរងគ្រោះដោយរលកកម្តៅ និងទឹកជំនន់ភ្លាមៗ ដែលបានបំផ្លាញសាលារៀនជាង 110 នៅក្នុងខែឧសភាឆ្នាំមុន ។ សរុបមក កុមារក្នុងប្រទេសចំនួន ៨៥ ជុំវិញពិភពលោក បានបិទសាលារៀន ក្នុងនេះ ប្រទេសចំនួន 20 បានបិទសាលារៀនជាបណ្តោះអាសន្ននៅទូទាំងប្រទេស។

ក្នុងចំណោមសិស្សជិត 250 លាននាក់ដែលរងផលប៉ះពាល់ ប្រហែល 74% ស្ថិតនៅក្នុងប្រទេសដែលមានប្រាក់ចំណូលមធ្យម និងទាប។

អាស៊ីខាងត្បូងគឺជាតំបន់ដែលរងគ្រោះខ្លាំងជាងគេ ដោយមានសិស្សប្រមាណ 128 លាននាក់បានប្រឈមមុខនឹងព្រឹត្តិការណ៍អាកាសធាតុធ្ងន់ធ្ងរដែលទាក់ទងនឹងការប្រែប្រួលអាកាសធាតុ បន្ទាប់មកគឺអាស៊ីបូព៌ា និងប៉ាស៊ីហ្វិក។

ខែកញ្ញា ឆ្នាំ 2024 គឺជាខែដែលមានការបិទសាលារៀនច្រើនបំផុត ដោយសារតែគ្រោះថ្នាក់អាកាសធាតុ យ៉ាងហោចណាស់មានប្រទេសចំនួន 18 បានលុបចោលថ្នាក់រៀន ៕

ប្រភព Al  Jazeera

ដោយ ម៉ារ៉ា