ឯកឧត្ដម ង៉ូវ បូរីណា អញ្ជើញបិទសិក្ខាសាលាស្តីពីការផ្សព្វផ្សាយក្រមសីលធម៌ វិជ្ជាជីវៈសារព័ត៌មាន និងសមិទ្ធផលខេត្តត្បូងឃ្មុំ
អង្គសិក្ខាសាលា បានប្រព្រឹត្តទៅពេញមួយថ្ងៃ នៅថ្ងៃទី ១៥ ខែកុម្ភៈ ឆ្នាំ២០២៥ ដែលមានការអញ្ជើញជាអធិបតីបើកសិក្ខាសាលាស្តីពីការផ្សព្វផ្សាយក្រមសីលធម៌ វិជ្ជាជីវៈសារព័ត៌មាន និងសមិទ្ធផលខេត្តត្បូងឃ្មុំ ដោយ ឯកឧត្ដម សុខ ចាន់ភក្ដី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន និងមានការចូលរួមពី លោកជំទាវ មាស ច័ន្ទធីតា អនុរដ្ឋលេខាធិការ ក្រសួងបរិស្ថាន ឯកឧត្ដម ម៉ៅ ឌុង អភិបាលរង នៃគណៈអភិបាលខេត្តត្បូងឃ្មុំ និងមន្រ្ដីរាជការ មន្ទីរពាក់ព័ន្ធ និងសិក្ខាកាមសរុបចំនួន ៤៣២ នាក់ ក្នុងនោះ ស្រី ៦៥នាក់ ប្រុស ៣៦៧នាក់។
ពីធីបន្ទាប់មក វាគ្មិនកិត្តិយសបានធ្វើបទបង្ហាញ តាមរបៀបវារៈកម្មវិធី៖
១. បទបង្ហាញស្ដីពី ក្រមសីលធម៌ វិជ្ជាជីវៈសារព័ត៌មាន និងមូលដ្ឋានគ្រឹះសរសេរព័ត៌មាន ក្នុងសម័យឌីជីថល ដោយ លោកបណ្ឌិត ហោ គន្ធា ប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា
២. ការអានសេចក្ដីណែនាំ លេខ ០៧៤ សណន របស់ក្រសួងមហាផ្ទៃ ដោយលោក ធីន ស៊ីថាច ប្រធានមន្ទីរព័ត៌មានខេត្តត្បូងឃ្មុំ
៣. បទបង្ហាញស្ដីពី ការកែច្នៃសំណល់សំរាម ទៅជាពហុបំណង ដោយ លោក ស៊ី ឡែន អគ្គនាយក ក្រុមហ៊ុន សេវ ឌឹឡហ្វស៍ ខេមបូឌា
៤. បទបង្ហាញ ស្ដីពី សមិទ្ធផល និងការអភិវឌ្ឍន័ខេត្តត្បូងឃ្មុំ ដោយ ឯកឧត្ដម ម៉ៅ ឌុង អភិបាលរងខេត្ដត្បូងឃ្មុំ
៥. បទបង្ហាញស្ដីពី វិស័យបរិស្ថាន ដោយ លោកជំទាវ មាន ច័ន្ទធីតា អនុរដ្ឋលេខាធិការ ក្រសួងបរិស្ថាន និង
៦. នៅពេលរសៀល វេទិកា ស្ដីពី អ្នកសារព័ត៌មាន មន្ដ្រីរាជការថ្នាក់មូលដ្ឋាន គប្បីយល់ដឹង ពីការបម្រែបម្រួលអាកាសធាតុ និងបញ្ហាខ្យល់កខ្វក់ ដឹកនាំដោយ លោកជំទាវ មាស ច័ន្ទធីតា និងវាគ្មិនកិត្តិយសចំនួន ០៤រូបទៀត។
ជាលទ្ធផល សិក្ខាកាមទទួលបានចំណេះដឹង និងយល់ដឹងពីវិស័យបតិស្ថានបានច្បាស់ និងបានប្ដេជ្ញាចិត្ត ព្រមទាំងចូលរួមនូវ យុទ្ធនាការទាំងបី ជាពិសេស បានស្វែងយល់អំពីបញ្ហាគុណភាពខ្យល់ កត្ដានៃផលប៉ះពាល់ លើវិស័យបរិស្ថាន ក្រោមបទឧទ្ទេសនាមដោយលោកជំទាវ មាស ច័ន្ទធីតា អនុរដ្ឋលេខាធិការ ក្រសួងបរិស្ថាន។
នៅរសៀលម៉ោង ៤:០០នាទី ឯកឧត្ដម ង៉ូវ បូរីណា តំណាងដ៏ខ្ពង់ខ្ពស់ ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអញ្ជើញជាអធិបតីភាពបិទសិក្ខាសាលា រួមទាំងមានវត្តមាន លោកជំទាវ មាស ច័ន្ទធីតា អនុរដ្ឋលេខាធិការ ក្រសួងបរិស្ថាន ឯកឧត្ដមម៉ៅ ឌុង អភិបាលរង នៃគណៈអភិបាលខេត្តត្បូងឃ្មុំ មន្ត្រីរដ្ឋបាលខេត្ត ប្រធានមន្ទីរ អភិបាលស្រុកទាំង៣ និងមានសិក្ខាកាមសរុបចំនួន ៤៣២នាក់ ក្រោយពេលបិទបញ្ចប់ ក៏បានប្រគល់វិញ្ញាបនបត្របញ្ជាក់ការសិក្សាជូនដល់សិក្ខាកាមផងដែរ ។
ឯកឧត្តម ង៉ូវ បូរីណា បានផ្តាំផ្ញើដល់សិក្ខាកាមទាំងអស់ ត្រូវយកចំណេះដឹងទៅអនុវត្តឲ្យបានត្រឹមត្រូវតាមក្រមសីលធម៌ជាអ្នកសារព័ត៌មាន ព្រោះអ្នកសារព័ត៌មានជាអ្នកនាំសារដ៏ពូកែ នាំព័ត៌មានផ្សេងៗ រួមទាំងគោលនយោបាយរបស់រាជរដ្ឋាភិបាលទៅកាន់ប្រជាពលរដ្ឋ និងនាំព័ត៌មានពីប្រជាជនទៅកាន់រាជរដ្ឋាភិបាលវិញ ហើយត្រូវរួមគ្នាប្រយុទ្ធប្រឆាំងព័ត៌មានក្លែងក្លាយ ។
ជាមួយគ្នានេះ ឯកឧត្តម ង៉ូវ បូរីណា បានលើកឡើងពី «ធម្មនុញ្ញវិជ្ជាជីវៈសារព័ត៌មាន» ដែលក្រសួងព័ត៌មានបង្កើតឡើង គឺជាមូលដ្ឋានគ្រឹះរួមនៃក្រមសីលធម៌វិជ្ជាជីវៈសារព័ត៌មាន ដើម្បីអ្នកសារព័ត៌មាន មានមូលដ្ឋានរួម តម្លៃរួម សម្រាប់ការអនុវត្តវិជ្ជាជីវៈ ពង្រឹងការអនុវត្តក្រមសីលធម៌វិជ្ជាជីវៈ គណនេយ្យភាព អនុលោមភាព ឯករាជភាព និងជាពិសេសលើកកម្ពស់តម្លៃ និងពង្រឹងជំនឿទុកចិត្តមកលើវិជ្ជាជីវៈសារព័ត៌មាននៅកម្ពុជា ។
ឯកឧត្តមថា ក្រមសីលធម៌វិជ្ជាជីវៈអ្នកសារព័ត៌មាន គឺជាអាវក្រោះយ៉ាងសំខាន់ក្នុងការពារខ្លួនអ្នកសារព័ត៌មាន និងសម្រាប់ជាគុណតម្លៃរួមនៃវិជ្ជាជីវៈសារព័ត៌មាន។ ជាមួយនេះអ្នកសារព័ត៌មានត្រូវតែស្គាល់ពីខ្លួនឯងឱ្យបានច្បាស់ថា ខ្លួនយើងមិនមែនជាមន្ត្រីនគរបាលយុត្តិធម៌ទេ និងក៏មិនមែនជាតុលាការកាត់សេចក្តីឱ្យនរណាខុស នរណាត្រូវដែរ ហើយអ្នកសារព័ត៌មានក៏មិនមានអំណាចបញ្ជាឱ្យនរណាម្នាក់ធ្វើនេះ ឬធ្វើនោះបានដែរ ៕
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម