រដ្ឋមន្ត្រីក្រសួងការពារជាតិថៃបញ្ជាក់សាជាថ្មីថា សម្តេចធិបតី ហ៊ុន ម៉ាណែត មិនបានទូរស័ព្ទទៅសុំទោសថៃ ពីរឿងប្រាសាទតាមាន់ធំទេ ! លោកអង្វរសារព័ត៌មានថៃឲ្យជម្រះរឿងនេះជាបន្ទាន់ !...
ដោយ សូរ្យរិទ្ធ
ពីគេហទំព័រ mgronline របស់ថៃ
លោក «ភូមិថាំ» បញ្ជាក់ថា លោកមិនបាននិយាយថា សម្តេច«ហ៊ុន ម៉ាណែត» ទូរស័ព្ទទៅសុំទោសរឿងប្រាសាទតាមាន់ធំទេ ។ លោកបានសង្កត់ធ្ងន់ថា ទំនាក់ទំនងរវាងប្រទេសទាំងពីរថៃ-កម្ពុជាមានភាពល្អគ្រប់កម្រិត ខ្ញុំមិនចង់មានបញ្ហាអ្វីទេ សុំឱ្យអ្នកសារព័ត៌មានជួយជម្រះរឿងនេះឱ្យបានលឿន។
កាលពីម្សិលមិញ (20 កុម្ភៈ) នៅអាកាសយានដ្ឋានទី 2 កងទ័ពអាកាសថៃ លោក ភូមិថាំ វ៉េចឆាយាឆៃ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានបំភ្លឺករណីសារព័ត៌មានថៃចុះផ្សាយមិនត្រឹមត្រូវថា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានទូរស័ព្ទសម្តែងការសោកស្តាយចំពោះករណីប្រាសាទតាមាន់ធំ ដោយលោកថា ព័ត៌មាននេះកំពុងចេញផ្សាយព័ត៌មានដោយគ្មានការពិត ។
លោក ភូមិថាំ បន្តថា មេបញ្ជាការយោធភូមិភាគទី២ ថៃ បានតវ៉ាថា រឿងពលរដ្ឋខ្មែរឡើងច្រៀង វាមិនត្រឹមត្រូវ ប៉ុន្តែលោកបានផ្តល់បទសម្ភាសន៍ដល់ប្រព័ន្ធផ្សព្វផ្សាយថា «មិនគួរឲ្យមានរឿងអ្វីកើតឡើងនោះទេ និងកុំបារម្ភ ព្រោះវាដូចជាអ្វីដែលអ្នកទេសចរធ្វើនៅពេលពួកគេមកលេង ប៉ុន្តែមេបញ្ជាការគ្រប់ជាន់ថ្នាក់របស់កម្ពុជា និងថៃ អាចនិយាយគ្នាបាន អត់បញ្ហាទេ...។
លោក ភូមិថាំ បញ្ជាក់យ៉ាងច្បាស់ថា អ្វីដែលលោកចង់ឲ្យព័ត៌មានកែតម្រូវនោះ គឺ សម្តេចធិបតី ហ៊ុន ម៉ាណែត មិនបានទូរស័ព្ទទៅសុំទោសថៃទេ ហើយរឿងនេះមិនមានអ្វីនិយាយ ឬនិយាយដល់កម្រិតនោះទេ។ ខ្ញុំគ្រាន់តែចង់ឲ្យការនេះមានភាពរលូន ហើយបានបញ្ជាក់ជាថ្មីថា ទំនាក់ទំនងរវាងថៃ និងកម្ពុជា មានគ្រប់កម្រិត និយាយគ្នាបានល្អ វាជារឿងធម្មតា។ ខ្ញុំចង់សុំឱ្យជួយជម្រះ (Clear) ផងដែរ បើមិនដូច្នោះទេវានឹងមានបញ្ហា។
លោក ភូមិថាំ ថា ខណៈនេះយើងកំពុងដោះស្រាយបញ្ហាក្រុមជនខិលខូច Call Center ដែលទាមទារការសហការពីគ្រប់ភាគី ប៉ុន្តែប្រសិនបើមានព័ត៌មានចេញមកបង្កបញ្ហាដូចខាងលើបែបនេះ យល់ថាប្រព័ន្ធផ្សព្វផ្សាយប្រហែលជាមិនមានចេតនាទេ ឬផ្នែកខ្លះអាចមានភាពមិនស្របគ្នាក្នុងការនិយាយ ហើយនឹងមានព័ត៌មានបែបនេះចេញជានិច្ច ដែលគាត់មិនសប្បាយចិត្ត ៕
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម