«EIA មិនមែនជាអង្គភាពធ្វើអាជីវកម្ម រកប្រាក់ចំណូលនោះទេ តែជាអង្គភាពអនុវត្តច្បាប់ដែលមានទំនួលខុសត្រូវខ្ពស់ ទៅលើហេតុប៉ះពាល់បរិស្ថាន ដើម្បីធានាការពារសុខភាពបរិស្ថាន និងសុខភាពរបស់ប្រជាជនកម្ពុជា» នេះជាប្រសាសន៍របស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងឱកាសអញ្ជើញបើកសិក្ខាសាលាពិគ្រោះយោបល់លើសេចក្តីព្រាងស្តីពី «គោលការណ៍ណែនាំទូទៅ ការវាយតម្លៃបរិស្ថានជាយុទ្ធសាស្ត្រ» និង «ការវាយតម្លៃបរិស្ថានជាយុទ្ធសាស្ត្រ សម្រាប់ការវិនិយោគអាជីវកម្មខ្សាច់ តាមដងទន្លេមេគង្គកម្ពុជា» នាព្រឹកថ្ងៃអង្គារ ទី ២៥ ខែមកុម្ភៈ ឆ្នាំ២០២៥ នៅរាជធានីភ្នំពេញ។

នៅចំពោះមុខមន្រ្តីរាជការ តំណាងក្រុមហ៊ុន វិស័យឯកជន និងអង្គការដៃគូមកពីគ្រប់ស្ថាប័នពាក់ព័ន្ធ ឯកឧត្តមរដ្ឋមន្រ្តីក្រសួងបរិស្ថាន បានថ្លែងអំពីតួនាទី និងការអនុវត្តការងាររបស់នាយកដ្ឋានវាយតម្លៃហេតុប៉ះពាល់បរិស្ថាន(EIA) នៃក្រសួងបរិស្ថាន  ដែលចាំបាច់ត្រូវតែអនុវត្តតាមច្បាប់ ដើម្បីភាពស្អាតលើដី ភាពស្អាតក្នុងទឹក និងភាពស្អាតក្នុងផ្ទៃមេឃ។ និយាយជារួម ប្រសិនយើងជាតំណាងឱ្យប្រជាពលរដ្ឋជាង ១៧លាននាក់ មិនអនុវត្តច្បាប់ផង ធ្វើដូចម្តេចនឹងឱ្យក្រុមហ៊ុនអនុវត្តច្បាប់បាន ហើយកត្តាផលជះពីការបញ្ចេញកាកសំណល់ រឹង រាវដែលកើតចេញពីសកម្មភាពមិនទទួលខុសត្រូវ និងគិតតែពីផលចំណេញ១មុខរបស់អាជីវកម្មមួយចំនួន ហើយវានឹងបង្កជាផលអវិជ្ជមានទៅដល់បរិស្ថាន ធនធានធម្មជាតិ និងជាពិសេសសុខភាពរបស់ប្រជាពលរដ្ឋ។ ចំពោះឯកឧត្តមរដ្ឋមន្រ្តីផ្ទាល់ សុខភាពរបស់ប្រជាពលរដ្ឋគឺសំខាន់ណាស់ ហើយមានតម្លៃជាងប្រាក់កាក់ ដែលក្រុមហ៊ុនត្រូវបង់សងមកក្រសួងបរិស្ថាន នៅពេលដែលក្រសួងបានរកឃើញករណីល្មើសច្បាប់នោះទៅទៀត។

ជាមួយគ្នា ឯកឧត្តមបណ្ឌិត អ៊ាង សុផល្លែត បានលើកឡើងពីកិច្ចខិតខំប្រឹងប្រែងដោះស្រាយបញ្ហាអវិជ្ជមាន ផលប៉ះពាល់នានា ក្នុងវិស័យបរិស្ថានម្ដងមួយជំហានៗ ដើម្បីធានាដល់ស្ថិរភាពសង្គម ស្ថិរភាពសេដ្ឋកិច្ច និងស្ថិរភាពនយោបាយ មិនឱ្យប៉ះពាល់អ្នកវិនិយោគឡើយ។ ចំណែកការវាយតម្លៃហេតុប៉ះពាល់បរិស្ថាន(EIA)ក៏ប្រព្រឹត្តទៅសមស្របតាមច្បាប់ជាធរមាន ត្រឹមត្រូវ និងមានតម្លាភាព។ 

សូមបញ្ជាក់ថា ការសិក្សាការវាយតម្លៃហេតុប៉ះពាល់បរិស្ថាន គឺធ្វើឡើងស្របជាមួយលើការសិក្សាលើការប៉ះពាល់បរិស្ថានលើមេឃ ក្នុងផ្ទៃទឹក និងនៅលើដី។ ការសិក្សាឆ្លើយតបនឹងយុទ្ធសាស្រ្តចក្រាវិស័យបរិស្ថាន ដែលបានដាក់ចេញក្នុងអាណត្តិទី៧ របស់រាជរដ្ឋាភិបាល ដែលមានសសរស្តម្ភចំនួន៣ គឺភាពស្អាត ភាពបៃតង និងចីរភាព ក្នុងនោះភាពស្អាត គឺបានចង្អុលបង្ហាញពីការអនុវត្តយុទ្ធសាស្រ្តធ្វើឱ្យមានភាពស្អាតលើដី លើមេឃ និងទឹកស្អាត។ ជាមួយគ្នានេះការវាយតម្លៃហេតុប៉ះពាល់បរិស្ថាន នៅពេលរកឃើញថាមានផលប៉ះពាល់ គឺក្រុមហ៊ុនវិនយោគ អាចចៀសផុតពីការប៉ះពាល់ និងផលវិបាកដល់សង្គម សេដ្ឋកិច្ច និងដល់សុខភាពរបស់ប្រជាពលរដ្ឋ។ សំខាន់ជាងនេះទៀត គឺនាំមកនូវការវិនិយោគមួយមានចីរភាព និង និរន្តរភាពការងារ របស់ប្រជាពលរដ្ឋ ដែលបម្រើឱ្យការវិនិយោគនោះ៕