តុលាការ​វៀតណាម​កាត់ទោស​អ្នកកាសែត​ល្បីឈ្មោះម្នាក់ ​ឲ្យ​ជាប់គុក​៣០​ខែ ​ពីបទ​បង្ហោះ​ហ្វេ​ស​ប៊ុ​ក​រិះគន់​រដ្ឋាភិបាល​

ព័ត៌មានអន្តរជាតិថ្ងៃអាទិត្យ ទី02 ខែមិីនា ឆ្នាំ2025 ម៉ោង 11:17 នាទី ព្រឹក

 

ដោយ សាវុឌ្ឍ៖

 

តុលាការ​វៀតណាម​បាន​កាត់ទោស​អ្នកកាសែត​ឯករាជ្យ​ដ៏​លេចធ្លោ​ម្នាក់​ឱ្យ​ជាប់គុក ​៣០​ខែ ​ដោយសារ​ការ​បង្ហោះ​តាម​ហ្វេ​ស​ប៊ុ​ក​រិះគន់​រដ្ឋាភិបាល​ ។

ហ៊ុយ ឌឹក បានធ្វើការឱ្យកាសែតរដ្ឋល្បីៗជាច្រើនអង្គភាព មុនពេលងាកមកសរសេរ«ប្លុក»ដ៏ពេញនិយមបំផុតមួយរបស់វៀតណាម និងគណនីហ្វេសប៊ុកដែលគាត់បានរិះគន់មេដឹកនាំកុម្មុយនិស្តរបស់ប្រទេស លើបញ្ហាដូចជាអំពើពុករលួយ ការគ្រប់គ្រងប្រព័ន្ធផ្សព្វផ្សាយ និងទំនាក់ទំនងជាមួយចិន ។

​តាម​ទីភ្នាក់ងារ​ព័ត៌មាន​វៀតណាម តុលាការទីក្រុងហាណូយបានរកឃើញបុរសអាយុ 63 ឆ្នាំម្នាក់មានពិរុទ្ធពីបទរំលោភលើសេរីភាពលទ្ធិប្រជាធិបតេយ្យដើម្បីបំផ្លាញផលប្រយោជន៍របស់រដ្ឋដោយការបង្ហោះអត្ថបទចំនួន 13 នៅលើ Facebook ។

លោក ហ៊ុយ ឌឹក ថ្លែង​ថា លោក​មិន​មាន​ចេតនា​ប្រឆាំង​បក្ស​កុម្មុយនិស្ត ឬ​រដ្ឋាភិបាល​ទេ ប៉ុន្តែ​ត្រូវ​បាន​គេ​ទទួល​ស្គាល់​ថា​មាន​ខ្លឹមសារ​មួយ​ចំនួន​បំពាន​ផលប្រយោជន៍​គណបក្ស ដែល​គាត់​បាន​ទទួល​ខុស​ត្រូវ ហើយ​មាន​អារម្មណ៍​សោកស្ដាយ​ជា​ខ្លាំង។

មិនយូរប៉ុន្មាន មុនពេលការចាប់ខ្លួនអ្នកកាសែតនៅក្នុងខែមិថុនា លោក ហ៊ុយ ឌឹក ដែលជាឈ្មោះក្លែងក្លាយរបស់អ្នកកាសែត បានវាយប្រហារមេដឹកនាំដ៏មានឥទ្ធិពលបំផុតរបស់ប្រទេសគឺលោក តូ ឡាំ តាមអ៊ីនធឺណិត រួមទាំងអតីតមេដឹកនាំ ង្វៀន ភូ តុង ផងដែរ។ លោក ហ៊ុយ ឌឹក មាន​ឈ្មោះ​ពិត​ថា ទ្រុង ហ៊ុយសាន ជា​អតីត​មន្ត្រី​យោធា។

ប្រទេសវៀតណាមមិនមានប្រព័ន្ធផ្សព្វផ្សាយសេរីនៅក្នុងប្រទេសនោះទេ និងអនុវត្តការបង្រ្កាបយ៉ាងធ្ងន់ធ្ងរលើអ្នកប្រឆាំង ។ វៀតណាម​ជា​ប្រទេស​មួយ ​ក្នុង​ចំណោម​ប្រទេស​ដែល​ចាប់​អ្នក​កាសែត​ច្រើន​ជាង​គេ​ក្នុង​ពិភពលោក។ នេះ​បើ​តាម​អង្គការ​អ្នក​កាសែត​គ្មាន​ព្រំដែន ។

កាល​ពី​ខែ​មករា អតីត​មេធាវី​ដ៏​ល្បី​មួយ​រូប​ត្រូវ​បាន​កាត់​ទោស​ឲ្យ​ជាប់​ពន្ធនាគារ ៣ ឆ្នាំ​ពី​បទ​បង្ហោះ​តាម​ហ្វេសប៊ុក។

កាលពីខែធ្នូ ប្រទេសវៀតណាមបានចេញច្បាប់ថ្មីដែលតម្រូវឱ្យ Facebook និង TikTok ផ្ទៀងផ្ទាត់អត្តសញ្ញាណរបស់អ្នកប្រើប្រាស់ និងផ្តល់ទិន្នន័យរបស់ពួកគេដល់អាជ្ញាធរពាក់ព័ន្ធ ហើយក៏តម្រូវឱ្យក្រុមហ៊ុនបច្ចេកវិទ្យាយក្សទាំងអស់ដែលកំពុងប្រតិបត្តិការនៅក្នុងប្រទេសនេះ ផ្ទៀងផ្ទាត់គណនីអ្នកប្រើប្រាស់ជាមួយនឹងលេខទូរស័ព្ទ ឬលេខអត្តសញ្ញាណប័ណ្ណជាតិ និងរក្សាទុកព័ត៌មានទាំងនោះរួមជាមួយនឹងនាមខ្លួន និងនាមត្រកូល និងថ្ងៃខែឆ្នាំកំណើតរបស់អ្នកប្រើប្រាស់ ៕


ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល


ពាណិជ្ជកម្ម

អត្ថបទថ្មីៗ

អត្ថបទពេញនិយម