ខណៈដែលទូទាំងពិភពលោកប្រារព្ធទិវាអន្តរជាតិនារី ៨ មីនា ប្រទេសកម្ពុជា ក៏បានប្រារព្ធពិធី អបអរសាទរនៅតាមគ្រប់ក្រសួង ស្ថាប័ន ដោយផ្តោតលើការផ្តល់សិទ្ធិអំណាច ភាពអង់អាចដល់ស្ត្រី និងកុមារី ស្របតាមប្រធានបទ «សិទ្ធិ សមភាព និងភាពអង់អាចរបស់ស្រ្តី និងក្មេងស្រីគ្រប់រូប»  បង្ហាញពី​សមភាព​យេនឌ័រ និងការលើក​តម្កើង​សមិទ្ធផល​របស់​ស្ត្រី ។

នៅអង្គភាពប្រឆាំងអំពើពុករលួយ (អ.ប.ព.) ក៏បានប្រារព្ធពិធីអបអរសាទរ ខួបលើកទី១១៤ នៃទិវាអន្តរជាតិនារី ៨មីនា ឆ្នាំ២០២៥ យ៉ាងអធិកអធមផងដែរ ក្រោមអធិបតីភាពដ៏ខ្ពង់ខ្ពស់ ឯកឧត្តម តុប សំ ប្រធានក្រុមប្រឹក្សាជាតិប្រឆាំងអំពើពុករលួយ និងលោកជំទាវ ចិន ច័ន្ទមុនី ឧបការី ប្រធានក្រុមប្រឹក្សាវិន័យ និងត្រួតពិនិត្យផ្ទៃក្នុង និងជាប្រធានសមាគមនារី អ.ប.ព. ដោយមានការចូលរួមពីសំណាក់ថ្នាក់ដឹកនាំ និងមន្ត្រីរាជការ អ.ប.ព. ចំនួន ៣៣២រូប។

លោកជំទាវប្រធានសមាគមនារី បានមានប្រសាសន៍ថា ក្រោមម្លប់សុខសន្តិភាព ដែលទទួលបានដោយស្ថាបនិកឯក សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និង ក្រោមការដឹកនាំដ៏ឈ្លាសវៃ ប៉ិនប្រសព្វ ប្រកប ដោយគតិបណ្ឌិត និង ថាមពលរបស់សម្តេច មហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបន្តកំណត់លើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រីនិងក្មេងស្រីនៅគ្រប់វិស័យ ជាអាទិភាព នៅក្នុងរបៀបវារៈគោលនយោបាយនិងយុទ្ធសាស្ត្របញ្ចកោណដំណាក់កាលទី ១ ដោយបានផ្តល់ការគាំទ្រ ផ្តល់សិទ្ធិអំណាច តួនាទី ទាំងជាតិ និងថ្នាក់ក្រោមជាតិ ចូលរួមនៅក្នុងកិច្ចការសង្គម សេដ្ឋកិច្ច វប្បធម៌ និងនយោបាយ រួមទាំងទទួលបាននូវសេវាថែទាំសុខភាព និងសុខុមាលភាពសង្គម និងភាពជាអ្នកដឹកនាំក្នុងវិស័យផ្សេងៗ ។លោកជំទាវមានប្រសាសន៍បន្តថា ការផ្តល់អនុសាសន៍ដ៏ខ្ពង់ខ្ពស់របស់ ឯកឧត្តម ប្រធានក្រុមប្រឹក្សាជាតិប្រឆាំងអំពើ ពុករលួយ និងក្រោមការដឹកនាំគ្រប់គ្រង និងចង្អុលបង្ហាញផ្ទាល់ពីសំណាក់ កិត្តិនីតិកោសលបណ្ឌិត ទេសរដ្ឋមន្ត្រី ប្រធាន អ.ប.ព. អង្គភាពប្រឆាំងអំពើពុករលួយ នៅតែបន្តលើកកម្ពស់សមភាពយេនឌ័រ តាមរយៈការផ្តល់សិទ្ធិ តួនាទី និងផ្តល់ឱកាសជាអាទិភាពដល់មន្ត្រីជានារី ទទួលបាននូវការបណ្តុះបណ្តាលវិជ្ជាជីវៈជំនាញ ដើម្បីបង្កើន និងពង្រឹងសមត្ថភាព ក្នុងការបំពេញភារកិច្ចប្រតិបត្តិការទទួលបានជោគជ័យដូចបុរសដែរ ។

ឯកឧត្តម ប្រធានក្រុមប្រឹក្សាជាតិប្រឆាំងអំពើពុករលួយ បានកោតសរសើរ និងវាយតម្លៃខ្ពស់នូវសមិទ្ធផលភារកិច្ចរបស់នារី អ.ប.ព. ដែលទទួលផ្លែផ្កាបានក្នុងរយៈពេលកន្លងមក និងលើកទឹកចិត្តដល់មន្ត្រីជានារី អ.ប.ព. សម្រួចឆន្ទៈមុតស្រួចបន្តក្នុងការបំពេញភារកិច្ចក្នុងស្មារតីទទួលខុសត្រូវ មានថាមពល និងសាមគ្គីភាពយូរអង្វែង។

ចុងបញ្ចប់នៃកម្មវិធី ឯកឧត្តមប្រធានក្រុមប្រឹក្សាជាតិប្រឆាំងអំពើពុករលួយ បានប្រគល់បាច់ផ្កា និងវត្ថុអនុស្សាវរីយ ជូនដល់លោកជំទាវប្រធានសមាគមនារី ថ្នាក់ដឹកនាំ និងមន្ត្រីនារីទាំងអស់ ប្រកបដោយទឹកមុខញញឹម និងសប្បាយរីករាយ ៕