ដោយ សូរ្យរិទ្ធ៖

នាយក​រដ្ឋមន្ត្រីថៃ លោកស្រី ផែថងថាន បានដាក់ផែនការជំរុញសេដ្ឋកិច្ចដើម្បីបង្កើន GDP ឲ្យបានពី 3-3.5% ដោយមានដំណាក់កាល ៣ គឺរយៈពេលខ្លី មធ្យម និងវែង និងពន្លឿនការបិទកិច្ចព្រមព្រៀងគម្រោងវិនិយោគធំៗ និងពិភាក្សាជាមួយវិស័យឯកជន ។

លោកស្រី នាយករដ្ឋមន្ត្រីបានបង្ហោះរូបភាពនៃការពិភាក្សាជាមួយលោក ពិឆ័យ ឧបនាយករដ្ឋមន្ត្រី និង រដ្ឋមន្ត្រីក្រសួងហិរញ្ញវត្ថុ ជាមួយ​នឹង​សារ​បញ្ជាក់​ថា ក្នុង​កិច្ច​ប្រជុំ​គណៈរដ្ឋមន្ត្រី​កាល​ពី​សប្តាហ៍​មុន ខ្ញុំបានប្រគល់ឧបនាយករដ្ឋមន្ត្រី ពិឆ័យ បង្កើតផែនការជំរុញសេដ្ឋកិច្ចដើម្បីបង្កើន GDP ឲ្យបានពី 3-3.5% ។

លោក ពិឆ័យ បាន ប្រាប់ឲ្យដឹងពីផែនការត្រូវបានបែងចែកដូចខាងក្រោមៈ

ផែនការប្រតិបត្តិការរយៈពេលខ្លី និងមធ្យម

1. ពន្លឿនការបញ្ចេញថវិការបស់រដ្ឋាភិបាល សហគ្រាសរដ្ឋ និងមូលនិធិផ្សេងៗ ដែលមានសមតុល្យនៅសល់ជាង 1 សែនលានបាត។
2. បង្កើនប្រសិទ្ធភាពក្នុងការប្រើប្រាស់ថវិកា និងបង្វែរប្រាក់ដើម្បីគាំទ្រការកែទម្រង់សេដ្ឋកិច្ចរចនាសម្ព័ន្ធ
3. ពន្លឿនការវិនិយោគរបស់វិស័យឯកជន ជាពិសេសការវិនិយោគតាមរយៈ BOI ក្នុងឆ្នាំ 2024 មានសំណើសម្រាប់ការគាំទ្រប្រហែល 1.14 លានលានបាត ដោយជួយសម្រួលដល់ភាពងាយស្រួលនៃការធ្វើអាជីវកម្ម ជាពិសេសទាក់ទងនឹងអាជ្ញាប័ណ្ណផ្សេងៗ ។
4. ពន្លឿនការបិទការវិនិយោគ (Close investment deals) ហេដ្ឋារចនាសម្ព័ន្ធទ្រង់ទ្រាយធំ ដូចជាប្រព័ន្ធទឹក ដើម្បីបំពេញតម្រូវការកសិកម្ម ឧស្សាហកម្ម និងការប្រើប្រាស់ រួមទាំងគម្រោង Land Bridge ដែលជាផ្លូវរថភ្លើងតភ្ជាប់ទៅកាន់ប្រទេសចិន ពង្រីកព្រលានយន្តហោះ និងកំពង់ផែ ដើម្បីធ្វើឱ្យប្រទេសថៃក្លាយជាមជ្ឈមណ្ឌលដឹកជញ្ជូន ស្របតាមគោលនយោបាយ Ignite Thailand ។
5. ជំរុញការនាំចេញ ដូចជាការបើកទីផ្សារថ្មី ពន្លឿនការចរចាជាមួយដៃគូពាណិជ្ជកម្ម កាត់បន្ថយការកកស្ទះក្នុងនីតិវិធីនាំចេញ និងឲ្យ​​ថែរក្សា​តម្លៃ​កសិផល​ផង​ដែរ។
6. វិស័យទេសចរណ៍ ផ្តោតលើការរៀបចំព្រឹត្តិការណ៍ ពិធីបុណ្យ បង្កើនការចំណាយសម្រាប់មនុស្សម្នាក់ៗ និងពន្យារការស្នាក់នៅរបស់អ្នកទេសចរ ស្នាក់នៅក្នុងប្រទេសបានយូរ ។

សម្រាប់ផែនការរយៈពេលមធ្យម-វែង ផ្តោតលើការដោះស្រាយបញ្ហារចនាសម្ព័ន្ធសម្រាប់កំណើនប្រកបដោយចីរភាព

1. ចាប់ផ្តើមកំណែទម្រង់រចនាសម្ព័ន្ធឧស្សាហកម្មបែប Sandbox ដោយផ្អែកលើការផ្លាស់ប្តូរតម្រូវការទីផ្សារពិភពលោក និងការបង្កើនការប្រកួតប្រជែងនៃឧស្សាហកម្មដែលមានស្រាប់

2. ការកែតម្រូវរចនាសម្ព័ន្ធតម្លៃថាមពល និងការបង្កើនសមាមាត្រនៃថាមពលកកើតឡើងវិញដូចជា នយោបាយDirect PPA និង UGT ដើម្បីបំពេញតាមស្តង់ដារពាណិជ្ជកម្ម និងការវិនិយោគបច្ចុប្បន្ន ។
3. ពន្លឿនកំណែទម្រង់កសិកម្មក្នុងទម្រង់ Sandbox ដោយប្រើទីផ្សារនាំចេញ ដោយចាប់ផ្តើមពីផលិតផលកសិកម្មសំខាន់ៗដូចជា អង្ករ ដំឡូងមី កៅស៊ូ ដូងប្រេង និងអំពៅ ដោយសង្កត់ធ្ងន់លើតុល្យភាពនៃតម្រូវការ និងការផ្គត់ផ្គង់។ អភិវឌ្ឍកត្តាដើមទុន រួមមានដី គ្រាប់ពូជ ទឹក និងបង្កើនផលិតភាព ទាំងអស់នេះ ដើម្បីលើកកម្ពស់គុណភាពជីវិតរបស់កសិករ ៕