រដ្ឋាភិបាលសហរដ្ឋអាមេរិកបានប្រកាសដាក់ទណ្ឌកម្មទិដ្ឋាការប្រឆាំងនឹងមន្ត្រីរដ្ឋាភិបាលថៃ ទាំងអតីតកាលនិងបច្ចុប្បន្ន នេះដោយសារ​ការ​ធ្វើ​បត្យាប័ន​ជនជាតិ​អ៊ុយហ្គួរ​ ៤០​នាក់​ទៅ​ប្រទេស​ចិន ។

ថ្ងៃទី 15 ខែមីនា នេះ រដ្ឋមន្ត្រីការបរទេសអាមេរិក លោក ម៉ារកូ រូបាយអូ  (Marco Rubio) បាននិយាយថា រដ្ឋាភិបាលទីក្រុងវ៉ាស៊ីនតោន កំពុងអនុវត្តការរឹតបន្តឹង និងការត្រួតពិនិត្យទិដ្ឋាការ ចំពោះមន្ត្រីរដ្ឋាភិបាលថៃ ទាំងអតីតកាលនិងបច្ចុប្បន្ន ពីការចូលរួម ទាំងដោយផ្ទាល់ និងដោយប្រយោល មូលហេតុមកពីការ​បញ្ជូន​ជនជាតិ​អ៊ុយ​ហ្គួរ​ចំនួន​៤០​នាក់​ត្រឡប់​ទៅ​ប្រទេស​ចិន​វិញកាលពី​នៅ​ថ្ងៃ​ទី​២៧ កុម្ភៈ ២០២៥ ។

លោក រូបាយអូ មិន​បាន​បញ្ចេញ​ឈ្មោះ​មន្ត្រី​ថៃ​ដែល​ប្រឈម​នឹង​វិធានការ​បែប​នេះ​ សរុបមានមនុស្សប៉ុន្មាននាក់? ឬ​គេ​ជា​នរណា ? ប៉ុន្តែ​បាន​និយាយ​ថា វិធានការ​នេះ​អាច​នឹង​ត្រូវ​ពង្រីក​ដល់​សមាជិក​គ្រួសារ​របស់​មន្ត្រី​នោះ​ផង​ដែរ ហើយ​សហរដ្ឋ​អាមេរិក​នឹង​បន្ត​ប្រឆាំង​នឹង​កិច្ច​ខិតខំ​ប្រឹងប្រែង​របស់​ចិន ដែលដាក់សម្ពាធលើប្រទេសជាច្រើន ដើម្បីប្រគល់ជនជាតិ អ៊ុយហ្គួរ (Uyghurs) និងក្រុមជនជាតិដទៃទៀត ទោះបីជាមានហានិភ័យខ្ពស់ក៏ដោយ ក្រុមមនុស្សទាំងនេះនឹងមិនទទួលបានការការពារទេ។

រូបាយអូ និយាយទៀតថា ការប្រើអំណាចបែបនេះ អនុលោមតាមផ្នែក 212(a)(3)(C) នៃច្បាប់ស្តីពីអន្តោប្រវេសន៍ និងសញ្ជាតិរបស់សហរដ្ឋអាមេរិក ដែលផ្តល់អំណាចដល់ក្រសួងការបរទេស ក្នុងការប្រើប្រាស់វិធានការរឹតបន្តឹងទិដ្ឋាការ ជាមួយមន្ត្រីរដ្ឋាភិបាលបរទេស មិនថាក្នុងអតីតកាលឬបច្ចុប្បន្ន ដែលទទួលខុសត្រូវដោយផ្ទាល់ និងដោយប្រយោល ៕

Photo: AFP

ដោយ សូរ្យសែង