ថៃចាប់ជនជាតិខ្មែរ ៦នាក់ លួចចូលកាប់ឈើគ្រញូងក្នុងឧទ្យានជាតិខៅយ៉ៃ

ព័ត៌មានសង្គមថ្ងៃពុធ ទី19 ខែមិីនា ឆ្នាំ2025 ម៉ោង 6:33 នាទី ល្ងាច

អាជ្ញាធរថៃបានឆ្មក់ចាប់ខ្លួនពលករខ្មែរ ៦នាក់ ជាក្រុមចូលកាប់ឈើគ្រញូងក្នុងព្រៃឧទ្យានជាតិ ខៅយ៉ៃ បង្កសំឡេងយ៉ាងខ្លាំងដោយមិនខ្លាចច្បាប់ ដោយអះអាងថា មានជនជាតិថៃម្នាក់ចង្អុលមុខសញ្ញា ។

នៅថ្ងៃទី 18 ខែមីនា ឆ្នាំ 2025 កម្លាំងចម្រុះតាមចាប់ក្រុមកាប់គាស់ឈើ បន្ទាប់ពីទទួលទទួលសេចក្តីជូនដំណឹងពីមន្ត្រីនៃអង្គភាពការពារ និងបង្ក្រាបកណ្តាលទី២ និងទី៣ សហការជាមួយមន្ត្រីអង្គភាពការពារកងពលតូចថ្មើរជើងលេខ១០ របស់ថៃចេញល្បាត ។

អាជ្ញាធរថៃនិយាយថា ពេលទៅដល់តំបន់ព្រៃភ្នំប៊ុតាសោម នៅក្នុងតំបន់ឧទ្យានជាតិ ខៅយ៉ៃ ក្នុងខេត្តប្រាជិនបុរី គេបានរកឃើញដាននៃការកាប់ឈើដើម្បីជម្រះផ្លូវ ហើយមានស្នាមជើងរបស់មនុស្សជាច្រើន ហើយបានរកឃើញដើមគ្រញូងមួយដើមដែលត្រូវគេកាប់ និងឮសំឡេងទង្គិចច្រវាក់ពេញព្រៃ។ គេបានរកឃើញ ក្រុមកាប់ព្រៃ ប្រមាណ ១០នាក់ ក្នុងនេះជនសង្ស័យជាជនជាតិខ្មែរចំនួន ៦នាក់ត្រូវចាប់ខ្លួន ចំណែកអ្នកនៅសល់រត់ចូលព្រៃស្រោង ហើយរត់គេចខ្លួនបាត់ ។

ពីការស៊ើបសួរជនជាប់ចោទឈ្មោះ ម៉ប់ ចាត អាយុ ៦១ឆ្នាំ ជនជាតិខ្មែរ បានសារភាពថា បានចូលរួមជាមួយប្រជាពលរដ្ឋខ្មែរប្រមាណ ១០នាក់ ដោយមានសម្ភារៈ និងគ្រឿងឧបភោគបរិភោគ ចូលមកកាប់ឈើគ្រញូង មានជនជាតិថៃចង្អុលបង្ហាញចំណុច និងផ្តល់ប្រាក់ឈ្នួល។

ជំហានដំបូងវត្ថុដែលរឹបអូសបានមានឈើគ្រញូង ៣បន្ទះទំហំសរុប០.១៥០ម៉ែត្រគូប រួមនឹងច្រវាក់មួយខ្សែ និងសម្ភារមួយចំនួនទៀត សរុបចំនួន១១មុខ មុនពេលជនសង្ស័យត្រូវបានសមត្ថកិច្ចនាំខ្លួនទៅសាកសួរ ស្ថានីយ៍ប៉ូលីសស្រុកប្រាចាន់តាខាម ដើម្បីបន្តនីតិវិធីច្បាប់ ៕

ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល