យោងតាមការចុះផ្សាយរបស់សារព័ត៌មាន ព្រមទាំងមានការណែនាំពីថ្នាក់ដឹកនាំ នៅថ្ងៃទី១៨-២០ ខែមីនា ឆ្នាំ២០២៥ ក្រុមការងារនាយកដ្ឋានគាំពារបរិស្ថានដឹកនាំដោយលោក កែ វង្សវឌ្ឍនា អគ្គនាយករង និងជាប្រធានក្រុមទី២ នៃក្រុមការងារ «ប្រសិទ្ធភាពសុក្រឹតកម្មបរិស្ថានកិច្ចលើភាពស្អាត» បានដឹកនាំក្រុមការងារ ដោយសហការជាមួយរដ្ឋបាលស្រុកត្រពាំងផ្លុង និងមន្ទីរបរិស្ថាន ចុះត្រួតពិនិត្យករណីបង្ហូរសំណល់រាវចូលអូរធម្មជាតិ បង្កការបំពុល ដោយទីតាំងអគារកាស៊ីណូ ដែលស្ថិតនៅផ្លូវលេខ៧២ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ យ៉ាងហោចណាស់ក្រុមហ៊ុនកាស៊ីណូ ៣ ត្រូវបានរកឃើញថា បានបង្ហូរទឹកកខ្វក់ចូលប្រភពទឹកស្អាតធម្មជាតិ ដែលក្រុមហ៊ុនទាំងនេះបានលួចធ្វើសកម្មភាពខុសច្បាប់នេះអស់រយៈពេលជាច្រើ់នឆ្នាំមកហើយ ។ ក្រុមការងារទទួលបានលទ្ធផលបឋមដូចខាងក្រោម៖

១-កាស៊ីណូ រ៉ុងស៊ឺងទី រីសត

អ្នកគ្រប់គ្រងទីតាំងនេះ ពុំបានសហការជាមួយក្រុមការងារ ដើម្បីចូលពិនិត្យក្នុងទីតាំង និងសាកសួរព័ត៌មានពាក់ព័ន្ធនឹងដំណើរការកាស៊ីណូនេះ ដោយគាត់បានបញ្ជាក់ថា ជាប់បំពេញភារកិច្ចនៅរាជធានីភ្នំពេញ។ គាត់បានស្នើសុំក្រុមការងារជួបនៅពេលក្រោយ។ ក្រុមការងារបានត្រួតពិនិត្យនៅតាមអូរធម្មជាតិដែលហូរកាត់ទីតាំងកាស៊ីណូ និងយកសំណាកទឹកចំនួន៤ទីតាំង នៅខាងក្រោយក្រុមហ៊ុន ។

២- កាស៊ីណូ Grand Golden.,Ltd.

- បានដំណើរការនៅឆ្នាំ២០០៨ និងមានអ្នកស្នាក់នៅអចិន្ត្រៃយ៍ក្នុងអគារជួលមានចំនួន ៥០០នាក់ និងមានភ្ញៀវចូលស្នាក់នៅមានចំនួន ១៥០នាក់/ថ្ងៃ ហើយប្រើប្រាស់ទឹកអស់ចំនួន ២.៥០០ ម៉ែត្រគូប/ថ្ងៃ

- សំណល់រាវមានចំនួន ២.០០០ម៉ែត្រគូប/ថ្ងៃ ដែលចេញពីបន្ទប់ទឹក និងផ្ទះបាយ រួចហូរចូលអូរធម្មជាតិ។ ដោយទ្បែក សំណល់រាវដែលចេញពីបង្គន់ ហូរលាយទ្បំជាមួយលាមកចូលទៅក្នុងអាងសេបទិក

- ពុំមានរៀបចំរបាយការណ៍វាយតម្លៃហេតុប៉ះពាល់បរិស្ថាន និងលិខិតអនុញ្ញាតពាក់ព័ន្ធនឹងក្រសួងបរិស្ថានទេ

- ក្រុមការងារបានយកសំណាកចំនួន២ទីតាំង ដែលនៅចំណុចមាត់លូហូរចូលអូរធម្មជាតិ និងត្រង់ចំណុចស្ពានដែក។

៣-កាស៊ីណូ Pailin Trapaing

-  ដំណើរកានៅឆ្នាំ២០២៣ ដែលមានអ្នកស្នាក់នៅអចិន្ត្រៃយ៍ក្នុងអគារជួលចំនួន ៦០០នាក់ និងមានភ្ញៀវចូលស្នាក់នៅមានចំនួន៥០នាក់/ថ្ងៃ និងប្រើប្រាស់ទឹកអស់ចំនួន ៥០ម៉ែត្រគូប/ថ្ងៃ

-  សំណល់រាវដែលចេញពីបង្គន់អនាម័យ ត្រូវបានបង្ហូរចូលអាងស្តុកចំនួន១ ដែលមានទំហំប្រមាណ ៥មx១៥មx២,៥ម រួចបង្ហូរចូលអូរធម្មជាតិ ដែលនៅជាប់ទីតាំងអគារ។ ដោយឡែកសំណល់រាវដែលចេញពីបន្ទប់ទឹក និងផ្ទះបាយ បានបង្ហូរចូលអូរតែម្តង

-  ពុំមានរៀបចំរបាយការណ៍វាយតម្លៃហេតុប៉ះពាល់បរិស្ថាន

-  ក្រុមការងារបានយកសំណាកទឹកចំនួន ២ទីតាំង ដែលនៅមាត់លូហូរចូលអូរធម្មជាតិ និងខ្សែទឹកក្រោម។

ក្រុមការងារបានបញ្ជាក់ពីចំណាត់ការរបស់ក្រសួងបរិស្ថាន ដើម្បីឲ្យក្រុមហ៊ុនអនុវត្តបន្ទាន់លើករណីនេះ ស្របតាមក្រមបរិស្ថាននិងធនធានធម្មជាតិ និងសារាចររបស់រាជរដ្ឋាភិបាល លេខ ០៣សរ ចុះថ្ងៃទី១២ ខែមីនា ឆ្នាំ២០២៥ ស្តីពី «វិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ» ដូចខាងក្រោម៖

១-ក្រុមហ៊ុនត្រូវបញ្ឈប់ការបង្ហូរសំណល់រាវចេញពីទីតាំងចូលអូរធម្មជាតិជាបណ្តោះអាសន្ន រហូតទទួលបានការអនុញ្ញាតពីក្រសួងបរិស្ថាន។

២-ត្រូវពិន័យអន្តរកាលលើករណី៖

-  ការបញ្ចេញសំណល់រាវពុំបានសម្អាតត្រឹមត្រូវ និងលើសកម្រិតស្តង់ដារ គឺល្មើសទៅនឹងមាត្រា១៥៦ មាត្រា១៦០ មាត្រា២៨៧ មាត្រា២៨៩ នៃក្រមបរិស្ថាននិងធនធានធម្មជាតិ ដែលត្រូវរៀបចំប្រព័ន្ធសម្អាតឱ្យបានត្រឹមត្រូវដោយប្រើក្រុមហ៊ុនផ្តល់សេវាវិស្វកម្មបរិស្ថានដែលទទួលការអនុញ្ញាតពីក្រសួងបរិស្ថាន

-  ការបំពុលទឹកអូរធម្មជាតិ គឺល្មើសទៅនឹងមាត្រា១៥៦ មាត្រា១៦០ មាត្រា២៨៧ មាត្រា២៩០ នៃក្រមបរិស្ថាននិងធនធានធម្មជាតិ

-  ដំណើរការអាជីវកម្ម ដោយពុំបានរៀបចំរបាយការណ៍វាយតម្លៃហេតុប៉ះពាល់បរិស្ថាន និងកិច្ចសន្យាការពារបរិស្ថាន គឺល្មើសនឹងមាត្រា៦៦៨ នៃក្រមបរិស្ថាន និងធនធានធម្មជាតិ និងត្រូវរៀបចំរបាយការណ៍ ឱ្យរួចរាល់ក្នុងរយៈពេល ៦ខែ។

៣-ក្រុមហ៊ុនត្រូវស្ដារសម្អាតបរិស្ថាន ជាពិសេសប្រព័ន្ធអូរធម្មជាតិនៅទីតាំងដែលទទួលរងការបំពុលឱ្យមានភាពល្អប្រសើរឡើងវិញ។

៤-ក្រុមហ៊ុនត្រូវផ្តល់សំណងការខូចខាតលើផលប៉ះពាល់បរិស្ថាន និងសុខភាពសាធារណៈ ទៅតាមការគណនាជាក់ស្តែងរបស់មន្ត្រីជំនាញ ដោយអនុលោមតាមក្រមបរិស្ថាននិងធនធានធម្មជាតិ។

៥-ក្នុងករណីក្រុមហ៊ុនមិនអនុវត្តតាមការសម្រេចខាងលើ ក្រសួងបរិស្ថាននឹងចាត់វិធានការច្បាប់ជាធរមាន ៕