«មុននឹងយើងទៅរកវិស័យឯកជនមកវិនិយោគ យើងត្រូវផ្ដោតទៅលើការពង្រឹងសមត្ថភាពរបស់សហគមន៍ បើគាត់បានជោគជ័យនៅហ្នឹងកន្លែងជាផលិតផលរួចទៅហើយ ព្រោះផលិតផលនៅមូលដ្ឋានសុទ្ធតែមាន។ សំណួរសួរថា អ៊ីចឹងយើងឈប់ឲ្យវិស័យឯកជនចូលវិនិយោគ? អត់ទេ ព្រោះសមត្ថភាពរបស់សហគមន៍មិនអាចទៅគ្រប់កន្លែងបានទេ កន្លែងណាសហគមន៍គ្រប់គ្រងបានយើងឲ្យសហគមន៍ តែកន្លែងខ្លះអត់បានទេ»។

នេះជាប្រសាសន៍របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ថ្លែងនៅក្នុងឱកាសអញ្ជើញទៅបុណ្យទន្លេលើកទី ៩ ក្រោមប្រធានបទ «គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ» នាល្ងាចថ្ងៃសៅរ៍ ទី២២ មីនា ២០២៥ នៅខេត្តតាកែវ ។

សម្ដេចមហាធិបតីបានណែនាំដល់ក្រសួង ស្ថាប័នពាក់ព័ន្ធ ត្រូវរួមគ្នាពង្រឹងសមត្ថភាពប្រជាសហគមន៍នៅមូលដ្ឋានទេសចរណ៍ ឲ្យបានយល់ពីបដិសណ្ឋារកិច្ច និងការផ្ដល់សេវាគាំទ្រនានា សំដៅដល់ការចូលរួមចំណែកទាក់ទាញភ្ញៀវទេសចរកាន់តែល្អប្រសើរបន្ថែមទៀត។

សម្ដេចមហាបវរធិបតីបានអះអាងថា ការពង្រឹងសមត្ថភាពប្រជាសហគមន៍ ជាចំណែកមួយដ៏សំខាន់ក្នុងការរុញឲ្យពួកគាត់កាន់តែទទួលបានជោគជ័យ ជាមួយនឹងផលិតផលដែលមាននៅហ្នឹ​ងកន្លែង មុនស្វែងរកការចូលរួមពីវិស័យឯកជនទៅវិនិយោគ។ សមត្ថភាពប្រជាសហគមន៍កាន់តែខ្ពស់ មិនមែនមានន័យថា មិនត្រូវការចូលរួមវិនិយោគបន្ថែមនោះទេ ប៉ុន្ដែជាការជួយបំពេញឲ្យគ្នាទៅវិញទៅមក នូវរាល់អ្វីដែលជាចំណុចខ្វះខាត និងសេចក្ដីតម្រូវការរបស់អតិថិជនដែលជាភ្ញៀវទេសចរ។

សម្ដេចមហាបវរធិបតីបានពន្យល់ថា ប្រសិនបើតំបន់ទេសចរណ៍ណាប្រជាសហគមន៍ អាចមានសមត្ថភាពផ្ដល់សេវាគាំទ្រគ្រប់គ្រាន់ហើយនោះ មិនចាំបាច់តម្រូវឲ្យមានការវិនិយោគចូលបន្ថែមទៀតឡើយ ប៉ុន្ដែប្រសិនបើតំបន់ទេសចរណ៍នោះធំ សហគមន៍មិនមានសមត្ថភាពគ្រប់គ្រាន់ទេ គឺត្រូវមានការវិនិយោគបន្ថែម ដើម្បីបំពេញសេចក្ដីត្រូវការរបស់ភ្ញៀវទេសចរ។ សម្ដេចបានអះអាងថា ការបើកច្រកឲ្យឯកជនវិនិយោគនៅតំបន់ទេសចរណ៍ គឺត្រូវគិតគូរឲ្យបានគ្រប់ជ្រុងជ្រោយ ដោយធ្វើយ៉ាងណា «មិនត្រូវឲ្យប៉ះពាល់ដល់សហគមន៍ដាច់ខាត» និង«មិនឲ្យបាត់បង់សណ្ឋានធាតុដើម ឬលក្ខណៈធម្មជាតិដែលជាអត្តសញ្ញាណ និងមិនត្រូវបិទតំបន់សាធារណៈ» នោះទេ៕

Photo Channel Telegram សម្តេចធិបតី