ទីភ្នាក់ងារព័ត៌មាន AFP រាយការណ៍ថា ចំនួនអ្នកស្ល.ា.ប់ដោយសារការរញ្ជួយដីដ៏ខ្លាំងដែលបានវាយប្រហារប្រទេស មីយ៉ាន់ម៉ា និងប្រទេសថៃបានកើនឡើងដល់ 1,600 នាក់កាលពីថ្ងៃសៅរ៍ (29) ខណៈដែលក្រុមអ្នកជួយសង្គ្រោះបានជីកតាមគំនរបាក់បែកនៃអគារដែលដួលរលំ។

ការរញ្ជួយដីកម្រិត 7.7 រ៉ិចទ័រ បានវាយប្រហារភាគពាយព្យនៃទីប្រជុំជនសាហ្គាំង(Sagaing) ភាគកណ្តាលប្រទេសមីយ៉ាន់ម៉ា កាលពីរសៀលថ្ងៃសុក្រ (28) ហើយត្រូវបានបន្តដោយការរញ្ជួយដីកម្រិត 6.7 រ៉ិចទ័រ នាប៉ុន្មាននាទីក្រោយមក។

គ្រោះរញ្ជួយដីនេះបានបំផ្លាញអគារ បាក់ស្ពាន និងផ្លូវថ្នល់ជាច្រើនកន្លែងក្នុងប្រទេស ជាមួយនឹងការខូចខាតយ៉ាងធ្ងន់ធ្ងរត្រូវបានរកឃើញនៅទីក្រុងម៉ាន់ដាលេយ (Mandalay) ជាទីក្រុងធំទីពីររបស់ប្រទេស និងមានប្រជាជនជាង 1.7 លាននាក់។

មន្ត្រីកាកបាទក្រហមនិយាយថា មនុស្សជាង 90 នាក់អាចជាប់នៅខាងក្នុងគំនរបាក់បែក។ អគារខុនដូ Sky Villa ពាក់កណ្តាលនៃអគារ 12 ជាន់បានរងការខូចខាត ។

ភូគព្ភវិទូនិយាយថា នេះគឺជាការរញ្ជួយដីដ៏ធំបំផុតដែលមីយ៉ាន់ម៉ាបានជួបប្រទះក្នុងរយៈពេលជាច្រើនទសវត្សរ៍ ហើយ​ការ​រញ្ជួយ​ខ្លាំង​ ​បំផ្លាញ​អគារ​នានា​នៅ​ទូទាំង​ទីក្រុង​បាងកក ដែល​មាន​ចម្ងាយ​រាប់រយ​គីឡូម៉ែត្រ​ពី​ចំណុច​កណ្តាល​នៃ​ការ​រញ្ជួយ​ដី។

អ្នក​យក​ព័ត៌មាន AFP ម្នាក់​បាន​ឃើញ​វត្ត​ចំណាស់​មួយ​សតវត្ស​ក្នុង​ទីក្រុងម៉ាន់ដាលេយបាន​ដួល​រលំ។

អាកាសយានដ្ឋានម៉ាន់ដាលេយ ក៏ត្រូវបានរាយការណ៍ថាបានខូចខាតផងដែរ នោះនឹងធ្វើឱ្យកិច្ចខិតខំប្រឹងប្រែងផ្តល់ជំនួយកាន់តែស្មុគស្មាញនៅក្នុងប្រទេសដែលជួយសង្គ្រោះ និងប្រព័ន្ធថែទាំសុខភាពត្រូវបានវាយលុកដោយសង្រ្គាមស៊ីវិលរយៈពេល 4 ឆ្នាំបន្ទាប់ពីរដ្ឋប្រហារឆ្នាំ 2021 ។

ឧត្តម​សេនីយ៍ មីន អង ឡាំង បាន​អំពាវ​នាវ​សុំ​ជំនួយ​អន្តរជាតិ​កាល​ពី​ថ្ងៃ​សុក្រ ទី ២៨ មីនា ដែលបង្ហាញពីភាពធ្ងន់ធ្ងរនៃគ្រោះមហន្តរាយនេះ បន្ទាប់​ពី​រដ្ឋាភិបាល​យោធា​មុន​ៗ​បដិសេធ​ជំនួយ​បរទេស សូម្បី​តែ​ក្នុង​ព្រឹត្តិការណ៍​នៃ​គ្រោះ​ធម្មជាតិ​ដ៏​ធំ​មួយ អាជ្ញាធរ​មីយ៉ាន់ម៉ាបាន​ប្រកាស​ដាក់​រដ្ឋ​ក្នុង​ភាព​អាសន្ន​ក្នុង​ស្រុក​ចំនួន ៦ ដែល​រង​គ្រោះ​ខ្លាំង​បំផុត​បន្ទាប់​ពី​ការ​រញ្ជួយ​ដី ហើយនៅមន្ទីរពេទ្យក្នុងទីក្រុងណៃពីដោ គ្រូពេទ្យត្រូវតែព្យាបាលអ្នករបួសនៅកន្លែងបើកចំហ។

ការផ្តល់ជំនួយពីបរទេសកំពុងចាប់ផ្តើមចូលមក ខណៈដែលប្រធានាធិបតីសហរដ្ឋអាមេរិក ដូណាល់ ត្រាំ បានសន្យាផ្តល់ជំនួយ ឯជំនួយដំបូងបានមកដល់ប្រទេសឥណ្ឌា ។ ប្រទេសចិនបាននិយាយថា ខ្លួនបានបញ្ជូនបុគ្គលិកសង្គ្រោះជាង 80 នាក់ទៅកាន់ប្រទេសមីយ៉ាន់ម៉ា និងបានសន្យាផ្តល់ជំនួយសង្គ្រោះបន្ទាន់ចំនួន 13.8 លានដុល្លារ។

ទីភ្នាក់ងារ​ផ្តល់​ជំនួយ​បាន​ព្រមាន​មី​យ៉ាន់​ម៉ា​មិន​បាន​ត្រៀម​ខ្លួន​សម្រាប់​គ្រោះ​មហន្តរាយ​ក្នុង​ទំហំ​នេះ​ទេ ហើយ​មនុស្ស​ប្រហែល ​៣,៥​លាន​នាក់​ត្រូវ​បាន​ផ្លាស់​ប្តូរ​ទីលំនៅ​ដោយសារ​សង្គ្រាម​ស៊ីវិល​ដែល​កំពុង​ឆាបឆេះ​។ មនុស្ស​ជា​ច្រើន​បាន​ប្រឈម​នឹង​ការ​អត់ឃ្លាន​សូម្បី​តែ​មុន​ការ​រញ្ជួយ​ដី​ក៏​ដោយ ៕

អត្ថបទ សូរ្យសែង