ប្រទេសកម្ពុជាបានសម្រេចវឌ្ឍនភាពក្នុងវិស័យបរិស្ថាន ដែលឆ្លុះបញ្ចាំងតាមរយៈការកើនឡើងនៃពិន្ទុនៃសន្ទស្សន៍សមិទ្ធផលបរិស្ថាន(Environmental Performance Index: EPI) ដោយផ្តោតលើការគ្រប់គ្រងធនធានធម្មជាតិ ការគ្រប់គ្រងការបំពុលបរិស្ថាន សមត្ថភាពបន្ស៊ាំទៅនឹងការប្រែប្រួលអាកាសធាតុ និងអភិបាលកិច្ចនៃការប្រែប្រួលអាកាសធាតុ  ពី ៣០,១០ ក្នុងឆ្នាំ២០២២ ដល់ ៣១,២០ ក្នុងឆ្នាំ២០២៤ នេះបើយោងតាមរបាយការណ៍លទ្ធផលប្រចាំឆ្នាំ២០២៤ របស់អង្គការសហប្រជាជាតិប្រចាំនៅកម្ពុជា ដែលបានបោះពុម្ពនៅខែមីនា ឆ្នាំ២០២៥។

ការសម្រេចលទ្ធផលជាវិជ្ជមាននេះ បានមកពីការប្តេជ្ញាចិត្ត និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ចំពោះវិស័យបរិស្ថាន តាមរយៈការដាក់ចេញនូវគោលនយោបាយ និងយុទ្ធសាស្រ្តនានា ក្នុងគោលបំណងលើក​កម្ពស់​គុណភាពបរិស្ថាន សុខភាពសាធារណៈ និងដើម្បីប្រែក្លាយសក្តានុពលវិស័យបរិស្ថាន សម្រាប់បម្រើជាឧត្តមប្រយោជន៍ជូនប្រជាជនកម្ពុជាគ្រប់ជំនាន់ និងលើកតម្កើងកិត្យានុភាពប្រទេសកម្ពុជាលើឆាកអន្តរជាតិ។

តាមរយៈការដាក់ចេញនូវទស្សនវិស័យប្រកបដោយភាពជាក់លាក់ ភាពប្រាកដនិយម និងមានមហិច្ឆតា ដើម្បីកម្ពុជាជាប្រទេសមានបរិស្ថានរូបវន្ត និងធម្មជាតិប្រកបដោយសុខដុមភាព ភាពធន់ បរិយាបន្ន និងតុល្យភាពរវាងការអភិវឌ្ឍនិងការអភិរក្សធនធានធម្មជាតិ ឆ្ពោះទៅជាប្រទេសអព្យាក្រឹតកាបូនឆ្នាំ២០៥០ តាមរយៈការដាក់ចេញនូវយុទ្ធសាស្រ្តបញ្ចកោណ ដំណាក់កាលទី១ របស់អាណត្តិរាជរដ្ឋាភិបាល នីតិកាលទី៧ នៃរដ្ឋសភា រួមជាមួយនឹងការអនុវត្តសកម្មភាពជាជំហានៗប្រកបដោយភាពជឿជាក់នៃយុទ្ធសាស្រ្តចក្រាវិស័យបរិស្ថានឆ្នាំ២០២៣-២០២៨ ផងដែរនោះ បានធ្វើឱ្យកម្ពុជាមានទំនាក់ទំនងកិច្ចសហប្រតិបត្តិការអន្តរជាតិល្អប្រសើរ ជាមួយសហគមន៍អន្តរជាតិ អង្គការដៃគូអភិវឌ្ឍន៍ សមាគម សង្គមស៊ីវិល និងវិស័យឯកជន បានទាក់ទាញការទទួលស្គាល់ ការគាំទ្រ និងការចូលរួមសហការអនុវត្តសកម្មភាពនានា រហូតទទួលបានផ្លែផ្កាគួរជាទីមោទកភាព។

យ៉ាងណាមិញ ទោះបីមានការកើនឡើងក៏ដោយ ចំណាត់ថ្នាក់នេះបញ្ជាក់ពីតម្រូវការក្នុងការពង្រឹងការគ្រប់គ្រងបរិស្ថាន ការបង្កើនការអនុវត្តគោលនយោបាយ និងការបង្កើនការវិនិយោគលើការគ្រប់គ្រងធនធានប្រកបដោយនិរន្តរភាពបន្តទៀត។ បញ្ហាប្រឈមដែលនៅតែបន្តកើតមានក្នុងកិច្ចគាំពារបរិស្ថាន ការអភិរក្សជីវៈចម្រុះ និងភាពធន់នឹងអាកាសធាតុ ទាមទារឱ្យមានការពង្រីកកិច្ចសហប្រតិបត្តិការបន្ថែមទៀតក្នុងភាពជាដៃគូ និងការចូលរួមគ្រប់ភាគីពាក់ព័ន្ធដើម្បីរួមគ្នាអនុវត្តសកម្មភាពអាទិភាពជាបន្តបន្ទាប់ ឱ្យស្របនឹងការខិតខំប្រឹងប្រែងរបស់រាជរដ្ឋាភិបាលជាមួយនឹងការប្តេជ្ញាចិត្តបរិស្ថានសកលមួយនេះ។

គូសបញ្ជាក់ផងដែរថា វិស័យបរិស្ថាន គឺជាគោលដៅមួយ ក្នុងចំណោមគោលដៅ ១៧ផ្សេងទៀតក្នុងគោលដៅអភិវឌ្ឍន៍ដោយចីរភាព២០៣០ របស់អង្គការសហប្រជាជាតិ ដែលត្រូវបានអនុម័តដោយមេដឹកនាំប្រទេសចំនួន ១៩៣ប្រទេស នៅឆ្នាំ២០១៥ នាសម័យប្រជុំអង្គការសហប្រជាជាតិស្តីពីការអភិវឌ្ឍដោយចីរភាព នៅទីក្រុងញ៉ូវយ៉ក។ របៀបវារៈនេះបានដាក់ចេញគោលដៅចំនួន ១៧ និងទិសដៅចំនួន ១៦៩ ដោយឡែកសម្រាប់ប្រទេសកម្ពុជាបានកំណត់បន្ថែម ការបញ្ចប់បញ្ហាគ្រាប់មីន ជាគោលដៅទី១៨។ គោលបំណងរបស់របៀបវារៈ២០៣០ គឺដើម្បីធ្វើការអំពាវនាវជាសកលក្នុងការកាត់បន្ថយភាពក្រីក្រ ការការពារបរិស្ថាន និងអាកាសធាតុផែនដី និងធានាថាប្រជាជនគ្រប់រូប ដែលរស់នៅគ្រប់ទីកន្លែងរីករាយនឹងសន្តិភាព និងវិបុលភាព ៕