ធនាគារពិភពលោកប្រចាំប្រទេសថៃ៖ ទីក្រុងបាងកកកំពុងប្រឈមនឹងកម្តៅ ដែលអាចធ្វើឱ្យមនុស្សរាប់ពាន់នាក់បា.ត់ប.ង់ជីវិត
គេហទំព័រ springnews របស់ប្រទេសថៃ បានចេញផ្សាយ ដោយស្រង់ពីការព្យាករណ៍របស់ធនាគារពិភពលោក ប្រចាំប្រទេសថៃនៅថ្ងៃទី ២៣ ខែមេសា ឆ្នាំ ២០២៥ ថា ទីក្រុងបាងក កំពុងប្រឈមនឹងស្ថានភាពកម្តៅ ដែលអាចបណ្តាលឲ្យមនុស្ស 2,300 នាក់បាត់បង់ជីវិត តម្លៃអគ្គិសនីកើនឡើងដល់ 17 ពាន់លានបាត (506,494,600 ដុល្លារ) ក្នុងមួយឆ្នាំ និងបាត់បង់ថ្លៃកម្លាំងពលកម្ម 44 ពាន់លានបាត (1 ពាន់លានដុល្លារ)។
ពលរដ្ឋក្នុងទីក្រុងបាងកក ធ្លាប់ចាប់អារម្មណ៍ទេថា ហេតុអ្វីបានជាតំបន់ខាងក្នុងទីក្រុងមានអារម្មណ៍ក្តៅជាងតំបន់ខាងក្រៅទីក្រុង? ជាការពិតណាស់... ប្រទេសថៃនឹងអាកាសធាតុក្តៅដើរទន្ទឹមគ្នា ប៉ុន្តែហេតុផលមួយទៀត គឺបាតុភូតមួយហៅថា «កោះកម្តៅក្នុងទីក្រុង (Urban heat Islands)» គឺមើលមិនឃើញទេ ប៉ុន្តែវាមានឥទ្ធិពលខ្លាំងលើជីវិតរបស់មនុស្សជាងការគិត ។
តាមរបាយការណ៍បង្ហាញថា ៖
- «ការកើនឡើងកម្តៅត្រឹម 1 អង្សា អាចនាំឱ្យមានការបាត់បង់ជីវិតមនុស្សប្រមាណ 2,300 នាក់» ។
- «បាត់បង់ថ្លៃពលកម្មជាង 44 ពាន់លានបាត ស្មើ (1 ពាន់លានដុល្លារ)»
- «ថ្លៃអគ្គិសនីនឹងកើនឡើង 17 ពាន់លានបាត (506,494,600) ដុល្លារ)ក្នុងមួយឆ្នាំ»។
សារព័ត៌មាន «មតិអ្នក» សូមអញ្ជើញមកយល់ពីបាតុភូតកោះកម្ដៅក្នុងទីក្រុង តើវាមានគ្រោះថ្នាក់ដល់កម្រិតណា? មានផលប៉ះពាល់អ្វីខ្លះ? ព្រមទាំងសរុបដំណោះស្រាយ 4 ពីធនាគារពិភពលោកប្រចាំប្រទេសថៃ ពេលទីក្រុងបាងកកក្លាយជាកោះកម្តៅ តើត្រូវដោះស្រាយដោយរបៀបណា?
តើឥទ្ធិពលកោះកម្តៅក្នុងទីក្រុងគឺជាអ្វី?
Urban Heat Island - UHI ឬ «ព្រឹត្តិការណ៍កោះកម្តៅក្នុងទីក្រុង» របាយការណ៍ចុងក្រោយពីធនាគារពិភពលោកប្រចាំប្រទេសថៃ និងទីក្រុងបាងកក ពន្យល់ថា នៅពេលថ្ងៃក្តៅ អគារខ្ពស់ៗ និងជាន់បេតុងនៅក្នុងទីក្រុងស្រូបយកកម្តៅ ហើយនឹងត្រូវខ្ជាក់ចេញនៅពេលយប់ ។
ហើយអ្វីដែលសំខាន់នោះ វត្តមានអគារខ្ពស់ៗនៅទូទាំងទីក្រុងបាងកកនៅតែរារាំងចលនារបស់ខ្យល់ ធ្វើឲ្យកម្តៅត្រូវផ្លាស់រអាក់រអួល រហូតដល់ទាញសំណើមទៅលើមេឃ ។ នេះជាហេតុផលមួយទៀតដែលធ្វើឲ្យមានភ្លៀងធ្លាក់ជាញឹកញាប់នៅពេលបញ្ចប់ការងារ។ នេះជាមូលហេតុ។
ផលប៉ះពាល់ទាំង ៥ នៃឥទ្ធិពលកោះកម្ដៅក្នុងទីក្រុង
- ទីក្រុងបាងកកមានថ្ងៃក្តៅកើនឡើង
កាលពីចន្លោះឆ្នាំ 1960 និងឆ្នាំ 2000 ទីក្រុងបាងកកមានសីតុណ្ហភាពខ្ពស់ជាង ៣៥ អង្សាសេ ប្រមាណ 60 ទៅ 100 ថ្ងៃក្នុងមួយឆ្នាំ ។ ការព្យាករណ៍គំរូអាកាសធាតុនៅក្នុងរបាយការណ៍បង្ហាញថា នៅឆ្នាំ 2100 ទីក្រុងបាងកកអាចជួបប្រទះបន្ថែម 153 ថ្ងៃក្នុងមួយឆ្នាំ ដែលសីតុណ្ហភាពលើសពី 35 អង្សាសេ ក្រោមការបំភាយឧស្ម័នផ្ទះកញ្ចក់កម្រិតមធ្យម។
- កម្តៅក្នុងទីក្រុងមិនដូចគ្នា
ភាពធ្ងន់ធ្ងរនៃកោះកម្តៅប្រែប្រួលតាមតំបន់។ ស្រុកមួយចំនួនដូចជា ប៉ាធុមវ៉ាន់ បាងរ័ក រ៉ាតទេវី និង ផាយ៉ាថៃ ឡើងកម្តៅរហូតដល់ 2.8 អង្សាសេ ដោយសារមានអគារខ្ពស់ និងផ្ទៃបេតុងក្រាស់ដែលកកកុញកម្តៅ ហើយបញ្ចេញយឺត។
- ហានិភ័យដល់សុខភាព - ទ្រព្យសម្បត្តិ - អាចបា.ត់ប.ង់ជីវិត
ប្រសិនបើសីតុណ្ហភាពក្នុងទីក្រុងកើនឡើងត្រឹមតែ 1 អង្សារសេ ទីក្រុងបាងកកអាចប្រឈមនឹងការបាត់បង់ជីវិតមនុស្ស 2,300 នាក់ ជាមួយនឹងចំនួនប្រជាជនងាយរងគ្រោះដែលមានហានិភ័យខ្ពស់ រួមទាំងកុមារ មានអាយុក្រោម 15 ឆ្នាំ ប្រហែល 880,000 នាក់ និងប្រហែល 1 លាននាក់ដែលមានអាយុលើសពី 65 ឆ្នាំដែលមានទំនោររស់នៅក្នុងតំបន់ដែលរងផលប៉ះពាល់ដោយកម្តៅខ្លាំងបំផុត។
- អាកាសធាតុក្តៅពេក ធ្វើអោយបង្អាក់ការងារ
ក្នុងឆ្នាំ 2019 មានមនុស្សប្រមាណ 1.3 លាននាក់ធ្វើការនៅទីក្រុងបាងកក ធ្វើការនៅខាងក្រៅយ៉ាងហោចណាស់ 1 ថ្ងៃក្នុងមួយសប្តាហ៍។ ប្រសិនបើសីតុណ្ហភាពក្នុងទីក្រុងកើនឡើងត្រឹមតែ 1 អង្សាសេ នោះផលិតភាពការងារអាចធ្លាក់ចុះប្រហែល 3.4% ដែលបណ្តាលឱ្យបាត់បង់ប្រាក់ឈ្នួលជាង 44 ពាន់លានបាត (1ពាន់លានដុល្លារ)ក្នុងមួយឆ្នាំ។
- តម្លៃអគ្គិសនីកើនឡើង
ប្រសិនបើសីតុណ្ហភាពក្នុងទីក្រុងកើនឡើងត្រឹមតែ 1 អង្សាសេ នោះតម្លៃអគ្គិសនីអាចកើនឡើងប្រមាណ 17 ពាន់លានបាត (506,494,600ដុល្លារ) ក្នុងមួយឆ្នាំ ហើយកម្តៅខ្លាំងក៏ប៉ះពាល់ដល់ហេដ្ឋារចនាសម្ព័ន្ធផ្សេងទៀតដែរ ដូចជា ផ្លូវថ្នល់ដែលត្រូវជួសជុលញឹកញាប់ បណ្តាលឱ្យមានបន្ទុកសេដ្ឋកិច្ចបន្ថែម ។
ធនាគារពិភពលោកប្រចាំប្រទេសថៃ បង្ហាញដំណោះស្រាយចំពោះវិបត្តិកោះកម្តៅក្នុងទីក្រុង ។
វិធានការរយៈពេលខ្លី
- បង្កើតប្រព័ន្ធព្រមានកម្តៅឲ្យបានទូលំទូលាយ និងអាចចូលទៅដល់សាធារណៈជនបានស្មើៗគ្នា
- បង្កើតមជ្ឈមណ្ឌលត្រជាក់ (cooling center)
- បង្កើតចំណុចសេវាទឹកស្អាតនៅតាមទីសាធារណៈ ជាពិសេសតំបន់ដែលមានហានិភ័យខ្ពស់ (អាកាសធាតុក្តៅ) ។
វិធានការរយៈពេលវែង
- ពិចារណាបង្កើតក្រុមការងារពិសេសលើកម្តៅទីក្រុង ធ្វើការជាមួយរដ្ឋាភិបាល វិស័យឯកជន សង្គមស៊ីវិល និងសាធារណៈជន
- ពង្រីកហេដ្ឋារចនាសម្ព័ន្ធបៃតង និងខៀវ ដូចជា សួនសាធារណៈ ដើមឈើតាមដងផ្លូវ ប្រភពទឹក ជាដើម។
- ការកែសម្រួលដំណើរការរៀបចំផែនការទីក្រុងដើម្បីទប់ទល់នឹងបញ្ហាដែលទាក់ទងនឹងអាកាសធាតុ ដូចជាការបែងចែកដី ការរៀបចំផែនការប្រព័ន្ធដឹកជញ្ជូន អគារខ្ពស់ បទបញ្ជា ប្រព័ន្ធសុខភាពសាធារណៈ ជាដើម។
- បង្កើតមូលនិធិដើម្បីអភិវឌ្ឍសមត្ថភាពទប់ទល់នឹងកម្តៅ ៕
ប្រភព៖ ធនាគារពិភពលោកប្រចាំប្រទេសថៃ + springnews
អត្ថបទប្រហាក់ប្រហែល
ពាណិជ្ជកម្ម
អត្ថបទថ្មីៗ
អត្ថបទពេញនិយម